Devendra Fadnavis on Loksabha Election Results in Maharashtra: अवघ्या तीन आठवड्यांत महाराष्ट्रात विधानसभा निवडणुकीसाठी मतदान होणार आहे. त्यानिमित्ताने महायुती, महाविकास आघाडी, तिसरी आघाडी, मनसे, वंचित बहुजन आघाडी अशा वेगवेगळ्या आघाड्यांमध्ये जागावाटप व उमेदवार जाहीर करण्याबाबतच्या घडामोडी वेगाने घडत आहेत. महायुतीमध्ये भाजपा, शिवसेना (एकनाथ शिंदे) व राष्ट्रवादी (अजित पवार) पक्षामध्ये जागावाटपाचा अंतिम आकडा अद्याप निश्चित झालेला नसतानाच उपमुख्यमंत्री देवेंद्र फडणवीस यांचं एक विधान चर्चेत आलं आहे.
भारतीय जनता पक्षानं आत्तापर्यंत विधानसभा निवडणुकीसाठी जाहीर केलेल्या जागांची संख्या १४६ च्या घरात गेली आहे. आधी ९९, मग २२ व शेवटी २५ अशा तीन उमेदवार याद्या पक्षाकडून जाहीर करण्यात आल्या आहेत. लोकसभेवेळी जिंकलेल्या जागा व विद्यमान आमदारांची संख्या या आधारावर जिंकून येण्याच्या मेरीटच्या आधारे तिकीट वाटप करण्यात आल्याचा दावा सर्वच पक्ष करत आहेत. मात्र, देवेंद्र फडणवीसांनी लोकसभा निवडणुकांच्या संदर्भात केलेल्या विधानामुळे तर्क-वितर्कांना उधाण आलं आहे.
काय म्हणाले देवेंद्र फडणवीस?
देवेंद्र फडणवीस सोमवारी संध्याकाळी टीव्ही ९ च्या कार्यक्रमात सहभागी झाले होते. यावेळी त्यांनी लोकसभा निवडणुकांमधील भारतीय जनता पक्षाच्या कामगिरीबाबत भाष्य केलं. तसेच, महायुतीच्याही कामगिरीवर भूमिका मांडली. महायुतीच्या पीछेहाटीमागे विरोधकांकडून करण्यात आलेला अपप्रचार कारणीभूत होता, असं ते म्हणाले.
“लोकसभा निवडणुकीत अपप्रचार झाला होता. त्या निवडणुकीत मविआला ४३.९ टक्के मतं मिळाली. आम्हाला ४३.६ टक्के मतं मिळाली. ०.३ टक्क्यांनी ते आमच्यापुढे होते. पण जागा मोठ्या प्रमाणावर तिकडे गेल्या. संविधानाबाबतच्या अपप्रचाराला आम्ही उत्तर देऊ शकलो नाही. महाराष्ट्रात आम्ही अतिआत्मविश्वासात होतो. ज्या ताकदीनं त्या अपप्रचाराचा विरोध केला जायला हवा होता, तेवढा आम्ही केला नाही. आम्हाला वाटलं त्याचा तेवढा प्रभाव पडणार नाही. पण त्याचा प्रभाव पडला. आमच्याविरोधात लोकांचं मत गेलं. त्यामुळे मतांचं ध्रुवीकरण झालं”, असं देवेंद्र फडणवीस यावेळी म्हणाले.
Devendra Fadnavis: फडणवीस यांच्या सचिवाला उमेदवारी, भाजपचे आतापर्यंत १४६ उमेदवार जाहीर
d
अ
“महाराष्ट्रात वोट जिहाद”
“महाराष्ट्रात एक वोट जिहादही झालं. धार्मिक स्थळांवरून लोकांना अमुक प्रकारे मतदान करण्याचं आवाहन केलं गेलं. असं केलं तर तुम्ही अल्लाला किंवा देवाला दगा द्याल असं आवाहन झालं. धुळे लोकसभा मतदारसंघातल्या ६ विधानसभा मतदारसंघांपैकी पाच ठिकाणी आम्ही १ लाख ९० हजारांनी पुढे होतो. पण मालेगाव सेंट्रलमध्ये १ लाख ९४ हजारांनी आम्ही पिछाडीवर गेलो आणि चार हजारांनी आम्ही हरलो. त्यामुळे वोट जिहादमुळे हे घडलं”, असा दावा देवेंद्र फडणवीसांनी केला.
फडणवीसांना विजयाचा आत्मविश्वास कशाच्या आधारावर?
देवेंद्र फडणवीसांनी यावेळी लोकसभेसारखी स्थिती नसल्याचा दावा केला. “आता अपप्रचार उघडा पडला आहे. लोकांना कळलंय की संविधान बदललं जाणार नाहीये, आरक्षणावर कोणताही धोका नाही. सगळ्यात महत्त्वाचं म्हणजे आपल्या हातात संविधान घेऊ फिरणारे राहुल गांधी अमेरिकेत जाऊन सांगतात की आरक्षण पूर्णपणे काढलं जाईल. वोट जिहादच्या माध्यमातून एका जागेवरून आख्खा लोकसभा मतदारसंघ पराभूत होऊ शकत होता, तसं आता होऊ शकत नाही. आता एका जागेमुळे सहा जागा प्रभावित केल्या जाऊ शकत नाहीत. त्यामुळे तेव्हा जी परिस्थिती होती, ती आता संपली आहे. आता मला पूर्ण आत्मविश्वास आहे की आम्ही ही निवडणूक जिंकू”, असं फडणवीस म्हणाले.
