शपथविधीआधी फडणवीसांची मोठी घोषणा! म्हणाले, “आज संध्याकाळनंतर आमचं सरकार…”

दरम्यान, नव्या मंत्र्यांच्या शपथविधीसाठी, मंत्रिमंडळ विस्तारासाठी देवेंद्र फडणवीस नागपुरात दाखल झाले आहेत. नागपुरात फडणवीसांचं जंगी स्वागत झालं. त्यानंतर ते भाजपाच्या विजयी रॅलीत सहभागी झाले. यावेळी त्यांनी कार्यकर्त्यांना संबोधित केलं. फडणवीस म्हणाले, “नुकत्याच झालेल्या महाराष्ट्राच्या विधानसभा निवडणुकीत आपल्या महायुतीला प्रचंड बहुमत मिळालं आहे. सर्व समाजांनी आपल्याला मोठ्या प्रमाणात मदत केली. खऱ्या अर्थाने लाडक्या बहिणींनी, शेतकऱ्यांनी, युवकांनी व राज्यातील गोरगरीब जनतेने आपल्याला मदत केली. मराठा, धनगर, आदिवासी व अनुसूचित जातींमधील लोकांनी आपल्यावर विश्वास दाखवला आहे. आपला हा विजय या सर्व मंडळींचा विजय आहे. मला आज या व्यासपीठावरून सर्वांना एकच गोष्ट सांगायची आहे की हा विजय कधीही आमच्या डोक्यात जाणार नाही. ही सत्ता आम्हाला कायम जमिनीवर ठेवेल. सत्ता मिळाली म्हणून आमचे पाय हवेत जाणार नाहीत. आम्हाला केवळ लोकांच्या सेवेसाठी ही सत्ता मिळाली आहे.

हे ही वाचा >> फडणवीसांच्या मंत्रिमंडळात पश्चिम महाराष्ट्राचा वरचष्मा? तिन्ही पक्षांकडून सहकार पंढरीला झुकतं माप; साताऱ्यातील चौघांना संधी

फडणवीसांकडून जनतेचे आभार

मुख्यमंत्री फडणवीस म्हणाले, “राज्य बदलण्यासाठी, लोकांच्या जीवनात परिवर्तन घडवून आणण्यासाठी, त्यांची स्वप्ने साकार करण्यासाठी, आपल्याला लोकांनी बहुमत दिलं आहे. त्यामुळे आम्ही लोकांसाठी काम करू. माझे सहकारी एकनाथ शिंदे व अजित पवार यांच्यासह संपूर्ण टीम महाराष्ट्राचं स्वप्न पूर्ण केल्याशिवाय स्वस्थ बसणार नाही. आज आमच्या मंत्र्यांचा शपथविधी पार पडेल आणि आज संध्याकाळनंतर आमचं हे सरकार दिवसाचे २४ तास, आठवड्याचे सातही दिवस तुमच्यासाठी काम करेल. तुम्ही आमच्यावर विश्वास दाखवलात, त्याबद्दल मी तुम्हा सर्वांचे आभार मानतो. विशेषतः मी नागपूरकरांचे आभार मानतो. ही माझी कर्मभूमी आणि जन्मभूमी आहे. येथील जनतेने मला आशीर्वाद दिला आहे. त्यामुळे मी त्यांचे आभार मानतो. आमचे नेते नितीन गडकरी, ज्यांच्या नेतृत्वाखाली आम्ही ही निवडणूक लढवली ते चंद्रशेखर बावनकुळे, राज्यातील आमची संपूर्ण टीम, केंद्रातील नेतृत्व, राजनाथ सिंह, जे.पी. नड्डा आणि सर्वात महत्त्वाचे आमचे अमित शाह या सर्वांचे मी आभार मानतो”.