ठाकरे गटाचे नेते तथा खासदार संजय राऊत यांनी पत्रकार परिषदेत खळबळजनक दावा केला आहे. तुरुंगात असताना मला जवळजवळ जीवे मारण्याचाच प्रयत्न करण्यात आला होता, असे संजय राऊत म्हणाले आहेत. राऊतांच्या या विधानामुळे राजकीय वर्तुळात वेगवेगळ्या चर्चांना उधाण आले आहे. दरम्यान राऊतांच्या या दाव्यावर राज्याचे उपमुख्यमंत्री तसेच गृहमंत्री देवेंद्र फडणवीस यांनी प्रतिक्रिया दिली आहे. ते आज (१७ फेब्रुवारी) माध्यम प्रतिनिधींशी बोलत होते.
हेही वाचा >>> संजय राऊत यांना तुरुंगात मारण्याचा प्रयत्न? पत्रकार परिषदेतील विधानामुळे खळबळ; म्हणाले “मी योग्य वेळी…”
सकाळी केलेला आरोप संध्याकाळी लक्षात राहात नाही
“संजय राऊत काहीही आरोप करू शकतात. ते दिवसातून तीन वेळा आरोप करतात. सकाळी कुठला आरोप केला आहे, हे संध्याकाळी त्यांच्या लक्षात राहात नाही. त्यामुळे त्यांनी केलेल्या आरोपावर मी काय बोलणार?” असे देवेंद्र फडणवीस म्हणाले आहेत.
हेही वाचा >>> पत्रकार शशिकांत वारिशे मृत्यप्रकरणी संजय राऊतांचा गंभीर आरोप; म्हणाले “एकाच वेळी सगळे…
संजय राऊत यांनी काय आरोप केला?
संजय राऊत शुक्रवारी (१७ फेब्रुवारी) रत्नागिरीत पत्रकार परिषदेत बोलत होते. यावेळी बोलताना त्यांनी मलाही तुरुंगात मारण्याचा प्रयत्न होता, असा दावा केला. मलाही आतमध्ये जवळजवळ मारण्याचाच प्रयत्न होता, असा दावा केला. “माझ्यासारख्या माणसाला तुरुंगात पाठवलं. मलाही आतमध्ये जवळजवळ मारण्याचाच प्रयत्न होता. याबाबत सर्वांनाच माहिती आहे. मी यावर योग्य वेळी बोलणार आहे,” असे मोठे विधान संजय राऊत यांनी केले. तसेच “तुम्हाला माणासं संपवण्यासाठी सत्तेवर आणले आहे का? शशिकांत वारिशे यांनी तुमचे काय वाकडे केले होते? वारिशे यांच्या आईचा आक्रोश मुख्यमंत्र्यांनी, गृहमंत्र्यांनी, येथील पालकमंत्र्यांनी पाहावा. हे महाराष्ट्रात चालणार नाही. ही महाराष्ट्राची संस्कृती नाही,” असेही संजय राऊत म्हणाले.
