राष्ट्रवादी काँग्रेस पक्षात उभी फूट पडल्याची गोष्ट २ जुलै २०२३ या दिवशी समोर आली होती. कारण अजित पवार यांनी थेट शरद पवार यांनाच आव्हान देत राष्ट्रवादी पक्षावरही दावा सांगितला होता. आज निवडणूक आयोगाने राष्ट्रवादी पक्ष हा अजित पवार यांच्याकडेच आहे असा निर्णय दिला आहे. हा निर्णय धक्कादायक असल्याचं जयंत पाटील यांनी म्हटलं आहे. खासदार सुप्रिया सुळे यांनीही या निर्णयाबाबत काही आश्चर्य वाटलं नाही आम्ही आता सर्वोच्च न्यायलयात दाद मागणार आहोत. शरद पवार यांनी शून्यातून विश्व उभं केलं. आम्ही पुन्हा सगळं उभं करु याची मला खात्री आहे असं सुप्रिया सुळे म्हणाल्या. तर उपमुख्यमंत्री देवेंद्र फडणवीस यांनी अजित पवार यांचं अभिनंदन केलं आहे.
काय आहे देवेंद्र फडणवीस यांची प्रतिक्रिया?
आमच्या महायुतीतील घटक पक्ष असलेल्या उपमुख्यमंत्री अजितदादा पवार यांना राष्ट्रवादी काँग्रेस पक्ष तसेच घड्याळ चिन्ह म्हणून निवडणूक आयोगाकडून मान्यता मिळाली, मी त्यांचे, सर्व सहकारी तसेच कार्यकर्त्यांचे मनापासून अभिनंदन करतो.
२०२३ च्या जुलै महिन्यात राष्ट्रवादी काँग्रेस पक्षात फूट पडली. तत्कालीन विरोधी पक्षनेते अजित पवार यांनी सत्ताधारी महायुतीबरोबर जात उपमुख्यमंत्री पदाचा कारभार स्वीकारला. त्यांच्याबरोबर काही आमदारही गेले. तसंच, जवळपास ७ मंत्र्यांनी त्यांच्याबरोबर मंत्रिपदाची शपथही घेतली. शिवसेनेप्रमाणे राष्ट्रवादीतही फूट पडल्याने हे प्रकरणही निवडणूक आयोगाकडे गेले. गेल्या सहा महिन्यांपासून निवडणूक आयोगाकडे राष्ट्रवादी काँग्रेस फुटीचं प्रकरण प्रलंबित होतं. गेल्या सहा महिन्यांत याप्रकरणी १० सुनावण्या निवडणूक आयोगाकडे झाल्या. या प्रत्येक सुनावणीत शरद पवार जातीने हजर होते.
हे पण वाचा- मोठी बातमी! अजित पवार गटच खरा राष्ट्रवादी काँग्रेस पक्ष, निवडणूक आयोगाचा निकाल
अजित पवार गट आणि शरद पवार गटाकडून निवडणूक आयोगाने मागितलेल्या सर्व कागदपत्रांची पूर्तता करण्यात आली. अखेर अजित पवार गटाला राष्ट्रवादीचं पक्षचिन्ह आणि पक्षनाव देण्यात आलं आहे. त्यामुळे आगामी राज्यसभा निवडणुकीत शरद पवार गटाला पक्षचिन्ह आणि पक्षनावासाठी तीन पर्याय सुचवण्याचे निर्देश निवडणूक आयोगाने दिले आहेत.