Devendra Fadnavis inaugurates 13D Theater at Panhala Fort : मुख्यमंत्री देवेंद्र फडणवीस यांनी गुरुवारी (६ मार्च) किल्ले पन्हाळगड, कोल्हापूर येथे आयोजित ‘विजयोत्सव’ कार्यक्रमाला हजेरी लावली. ६ मार्च १६७३ रोजी कोंडाजी फर्जंद यांनी आदिलशहाकडून पन्हाळगड जिंकून घेत छत्रपती शिवाजी महाराज यांच्या स्वराज्यात सामील केला होता. मुख्यमंत्र्यांनी त्या विजयोत्सवाचे औचित्य साधून या किल्ल्यावर उभारण्यात आलेल्या ’13D थिएटर’चे लोकार्पण केले. यावेळी मुख्यमंत्री देवेंद्र फडणवीस यांनी ‘पन्हाळगडचा रणसंग्राम’ हा लघुपट पाहिला व उपस्थितांना संबोधित केले. मुख्यमंत्री देवेंद्र फडणवीस म्हणाले, “परकीय आक्रमकांमुळे काळरात्र आलेली असताना राजमाता जिजाऊ माँसाहेब यांनी छत्रपती शिवाजी महाराज यांना घडवले. त्यातूनच छत्रपती शिवाजी महाराज यांनी अठरापगड जातीच्या लोकांना एकत्र करत स्वराज्य स्थापन केले. छत्रपती शिवाजी महाराज होते म्हणून आपण आहोत, छत्रपती शिवाजी महाराज नसते तर आपल्यापैकी कोणीच इथे दिसले नसते. म्हणूनच छत्रपती शिवाजी महाराज आमचे आराध्य दैवत आहेत.”
देवेंद्र फडणवीस म्हणाले, “छत्रपती संभाजी महाराज, महाराणी ताराराणी आणि त्यानंतरच्या जाज्ज्वल्य इतिहासात मराठ्यांनी अटकेपार झेंडे रोवले, हे छत्रपती शिवाजी महाराज यांचे तेज होते”. मुख्यमंत्री देवेंद्र फडणवीस यांनी यावेळी वीर शिवा काशिद व बाजीप्रभू देशपांडे यांच्या बलिदानाचा इतिहासदेखील विस्ताराने सांगितला. तसेच 13D थिएटरमुळे छत्रपती शिवाजी महाराज यांचा हा इतिहास जगता येणार असल्याचे सांगत फडणवीस यांनी यासाठी आमदार विनय कोरे यांचे आभार मानले.
किल्ले पन्हाळगड शिवकालीन पुनर्निर्मित होणारा पहिला किल्ला ठरणार
किल्ले पन्हाळगड शिवकालीन पुनर्निर्मित होणारा पहिला किल्ला असेल, असे सांगत यासाठी राज्य शासनाच्या वतीने निधीची कमतरता पडू दिली जाणार नाही, जोतिबाचा डोंगर विकासाचा आराखडा तयार करण्यात आला असून त्याला मान्यता दिली आहे, त्यासाठीचे प्राधिकरण येत्या १५ दिवसांत स्थापन करणार असल्याचे मुख्यमंत्री देवेंद्र फडणवीस यांनी यावेळी आश्वस्त केले. पंतप्रधान नरेंद्र मोदी यांनी छत्रपती शिवाजी महाराज यांचे १२ किल्ले जागतिक वारसास्थळ म्हणून नॉमिनेट केले असून छत्रपती शिवाजी महाराज यांचा वारसा जागतिक वारसा होण्यासाठी आपण प्रयत्न करत असल्याचे मुख्यमंत्री फडणवीस यांनी सांगितले.
पन्हाळगडावरील या कार्यक्रमाला विधानसभा अध्यक्ष राहुल नार्वेकर, उच्च व तंत्रशिक्षण मंत्री चंद्रकांत पाटील, आरोग्यमंत्री प्रकाश आबिटकर, राज्यमंत्री इंद्रनील नाईक, खासदार धनंजय महाडिक, खासदार धैर्यशील माने, आमदार विनय कोरे, आमदार अमल महाडिक, आमदार राहुल आवाडे आणि इतर मान्यवर उपस्थित होते.
