Devendra Fadnavis : “इतिहासकारांनी छत्रपती संभाजी महाराजांवर अन्याय केला, पण…”, ‘छावा’ पाहिल्यानंतर मुख्यमंत्र्यांनी काय प्रतिक्रिया दिली?

या चित्रपटाला ऐतिहासिक पार्श्वभूमी, चित्रपटातील कलाकार, भव्य सेट या सर्व गोष्टींसाठी सध्या सर्वत्र मोठ्या प्रमाणात कौतुक होत आहे. दरम्यान, राज्याच्या महिला व बालविकास मंत्री आदिती तटकरे यांनी विधिमंडळ सदस्य आणि मंत्र्यांसाठी छावा चित्रपटाच्या शोचे मुंबईत आयोजन केलं होतं. यावेळी मुख्यमंत्री देवेंद्र फडणवीस यांनी देखील छावा चित्रपट पाहिला. चित्रपट पाहिल्यानंतर मुख्यमंत्री फडणवीसांनी ‘छावा’ चित्रपटाचं कौतुक केलं. तसेच चित्रपटातील संपूर्ण कलाकारांचेही आभार मानत तोंडभरुन कौतुक केलं. यावेळी ‘छावा’ चित्रपटाबाबत बोलताना त्यांनी एक महत्वाचं विधानही केलं. “छत्रपती संभाजी महाराज संस्कृत पंडित, कवी आणि लेखक देखील होते. पण त्यांच्यावर इतिहासकारांनी अन्याय केला. मात्र, छावा चित्रपटाच्या माध्यमातून तो अन्याय दूर झाला”, अशी भावना मुख्यमंत्री फडणवीस यांनी व्यक्त केली.

देवेंद्र फडणवीस काय म्हणाले?

“छत्रपती संभाजी महाराज फक्त वीर नव्हते तर त्यांचं शौर्य, त्यांची वीरता, त्यांची विद्वत्ता या सर्वच गोष्टी अतुलनीय होत्या. छत्रपती संभाजी महाराजांना ११ भाषा ज्ञात होत्या. ते संस्कृतचेही पंडित होते, ते कवी होते, ते लेखक होते. छत्रपती संभाजी महाराज यांच्या संपूर्ण चरित्रावर एक प्रकारे इतिहासकारांनी खूप अन्याय केला. खरं तर देशभरात त्यांचं व्यक्तिमत्व जायला पाहिजे होतं, पण ते दुर्देवाने गेलं नव्हतं. आपण सर्वांनी ‘छावा’ पुस्तक वाचलं असेल, पण कदाचित देशातील काही लोकांनी वाचलं नसेल. पण आता या छावा चित्रपटामुळे संपूर्ण देशात छत्रपती संभाजी महाराज काय होते? हे पोहोचवण्याचं काम चित्रपटातील संपूर्ण टीमने केलं आहे. त्यामुळे या संपूर्ण टीमचं मी मनापासून अभिनंदन करतो”, असं देवेंद्र फडणवीस यांनी म्हटलं.

“सर्वात महत्वाचं म्हणजे आपण संपूर्ण चित्रपट पाहिला. कुठेही इतिहासाशी प्रातरणा न करता, जी ऐतिहासिक तत्व आहेत, ती तत्व कायम ठेवून त्या तत्वांना चित्रपटात परिवर्तित करण्याचं काम या संपूर्ण टीमने केलं. त्यामुळे मी ‘छावा’च्या संपूर्ण टीमला धन्यवाद देतो, त्यांचे आभार मानतो. छत्रपती संभाजी महाराजांचा इतिहास हा आमच्यासमोर जीवित करण्याचं काम चित्रपटातील संपूर्ण टीमने केलं आहे. खरोखर छावा चित्रपट खूप सुंदर बनवण्यात आला आहे”, असं देवेंद्र फडणवीस यांनी म्हटलं आहे. दरम्यान, यावेळी विधान परिषदेचे सभापती राम शिंदे, विधानसभेचे अध्यक्ष राहुल नार्वेकर, उपमुख्यमंत्री अजित पवार, मंत्री चंद्रकांत पाटील, चंद्रशेखर बावनकुळे, मंत्री गिरीश महाजन यांच्यासह आदी नेते उपस्थित होते.