Devendra Fadnavis : मुख्यमंत्रीपद मिळाल्यानंतर आता फडणवीसांची पुढील योजना काय?; म्हणाले, “माझा भर हा…”

मुख्यमंत्री देवेंद्र फडणवीस म्हणाले की, “महाराष्ट्र आता थांबणार नाही, महाराष्ट्राने आता कौल दिला आहे. येत्या काळात गोष्टी तर अनेक करायच्या आहेत. योजनादेखील अनेक चालवायच्या आहेत. पण माझा भर हा नदीजोड प्रकल्पांवर असणार आहे. कारण मी जलसंपदा मंत्री असताना चार नदीजोड प्रकल्पांना मान्यता दिली आहे. हे प्रकल्प महाराष्ट्राला कायम दुष्काळातून मुक्त करू शकतात. त्यामुळे या प्रकल्पांवर माझा भर राहणार आहे”.

पुढे बोलताना फडणवीस म्हणाले की, “ग्रीन एनर्जीवर माझा भर राहणार आहे. मागच्या काळात ५४ हजार मेगावॅटचे वेगवेगळे प्रोजेक्ट हातात घेतले आहेत. यामुळे २०२३ साली महाराष्ट्रातील ५२ टक्के वीज अपारंपारिक स्त्रोतातील म्हणजे ग्रीन एनर्जी असणार आहे. याचा फायदा शेती आणि उद्योग या दोन क्षेत्रांना याचा फायदा होणार आहे. यांना फायदा झाला तर महाराष्ट्रात रोजगार निर्मिती होईल आणि राज्याच्या अर्थव्यवस्थेला देखील चालना मिळेल”, असेही मुख्यमंत्री देवेंद्र फडणवीस म्हणाले.

हेही वाचा>> Devendra Fadnavis On Trolling : मुख्यमंत्री झाल्यानंतर देवेंद्र फडणवीसांनी ट्रोलर्सचे मानले आभार; म्हणाले, “माशी जरी शिंकली…”

मुंबईसाठीच्या योजनांबद्दल बोलताना फडणवीस म्हणाले की, “२०१६ साली मोदींच्या नेतृत्वात घोषणा केली होती की मुंबईच्या एमएमआर भागातील कोणत्याही भागातून कोणत्याही भागात जाण्यासाठी एक तासापेक्षा कमी वेळ लागला पाहिजे. त्याच्यासाठी आम्ही प्रयत्न करत आहोत. कोस्टल रोड झाला पुढे बांद्रा-वरळी सी लिंक आहे. त्यापुढे बांद्रा-वर्सोवा सी लिंकचे काम सुरू आहे. वर्सोवा-मढचं काम सुरू होतंय. मढ पासून विरारपर्यंत सी लिंक तयार करायची आहे. जपानच्या सरकारने त्यासाठी ४० हजार कोटी देण्याचे कबूल केले आहे. यामुळे मुंबईतील वाहतूक कोंडी कमी होईल”.

मुंबईथ ३७५ किलोमिटरचं मेट्रो नेटवर्क आपण तयार करत आहोत. सगळी काम होतील तेव्हा मुंबईकरांना दिवसातील तीन तास जास्त मिळतील असेही त्यांनी सांगितले.