“…म्हणून माझ्या पुराव्यांवर कुणी उत्तर देत नाही”, देवेंद्र फडणवीसांचा ठाकरे सरकारवर आरोप!

“आकडेवारी लपवली जातेय”

करोनाची आकडेवारी लपवली जात असल्याचा आरोप देवेंद्र फडणवीस यांनी यावेळी केला. “मी पुराव्यांसहीत कशाप्रकारे करोनाची आकडेवारी लपवली जात आहे हे सांगितलं आहे. माझे पुरावे खरे असून मी सरकारचीच आकडेवारी वापरली आहे. त्यामुळे त्याच्यावर कुणी उत्तर देत नाही”, असं फडणवीस म्हणाले आहेत.

“सरकारची घोषणा पूर्णपणे फसवी”

दरम्यान, यावेळी फडणवीसांनी म्युकरमायकोसिस रुग्णांना मोफत उपचार मिळण्याची राज्य सरकारने केलेली घोषणा फसवी असल्याचा दावा केला. “म्युकरमायकोसिसच्या उपचारांसाठी लोकांना खूप खर्च येतो आहे. त्याचे इंजेक्शन खूप महाग आहेत. सरकारच्या वतीने घोषणा करण्यात आली की महात्मा फुले जनआरोग्य योजनेअंतर्गत म्युकरमायकोसिसचे उपचार मोफत होतील. सरकारची घोषणा पूर्णपणे फसवी आहे. मोठ्या प्रमाणावर लोकं खासगी रुग्णालयांमध्ये दाखल आहेत. मोफत उपचार फक्त सरकारी आणि काही नोटिफाईड रुग्णालयांमध्ये होत आहेत. बहुतांशी रुग्णालयांमध्ये तो होत नाही”, असा दावा फडणवीसांनी यावेळी केला.

Coronavirus : राज्यात दिवसभरात २४ हजार ७५२ नवीन करोनाबाधित, ४५३ रूग्णांचा मृत्यू!

“इंजेक्शनचा पूर्ण खर्च सरकारने करावा”

“म्युकरमायकोसिसचे रुग्ण कोणत्याही रुग्णालयात दाखल असले, तरी त्यांना इंजेक्शन मोफत द्यायला हवं. सरकारने इंजेक्शन खरेदी करावेत आणि जिथे रुग्ण असतील, तिथला इंजेक्शनचा सगळा खर्च सरकारने दिला पाहिजे. त्यासोबतच खासगी रुग्णालयातल्या इतर उपचारांचे दर सरकारने ठरवले पाहिजेत. लोकं घरं विकत आहेत. १०-१५ लाख खर्च करत आहेत. पण तरी मृत्यू होत आहेत. त्यामुळे खोटी आश्वासनं देणं योग्य नसून तात्काळ कारवाई करायला हवी”, असं देखील फडणवीस यावेळी म्हणाले.