“उपमुख्यमंत्रीपद हा माझ्यासाठी धक्का होता, कारण…”, देवेंद्र फडणवीसांनी सांगितलं ‘त्या’ वेळी नेमकं काय घडलं?

काय घडलं वर्षभरापूर्वी?

राज्यात एकनाथ शिंदेंचं बंड यशस्वी ठरल्यानंतर उद्धव ठाकरेंना पायउतार व्हावं लागलं. त्यानंतर अपेक्षेप्रमाणे देवेंद्र फडणवीस मुख्यमंत्री होणार असल्याचीच चर्चा सगळीकडे ऐकायला मिळत होती. यासंदर्भात फडणवीसांनीच राज्यपालांकडे सरकार स्थापनेचा दावाही केला होता. देवेंद्र फडणवीस आणि एकनाथ शिंदे यांनी याबाबत माहिती देण्यासाठी जाहीर पत्रकार परिषद घेतली. या पत्रकार परिषदेत फडणवीसांची मुख्यमंत्रीपदी तर एकनाथ शिंदेंची उपमुख्यमंत्रीपदी घोषणा होणार असल्याचंही ठामपणे सांगितलं जात होतं. मात्र, देवेंद्र फडणवीसांनी पत्रकार परिषदेत वेगळीच घोषणा केली आणि सगळ्यांना आश्चर्याचा धक्का बसला.

स्वत: मुख्यमंत्रीपदी बसण्याऐवजी देवेंद्र फडणवीसांनी एकनाथ शिंदेंचीच मुख्यमंत्री म्हणून घोषणा केली, तसेच आपण कोणतंही सत्तेचं पद घेणार नसल्याचं त्यांनी जाहीर केलं. यामुळे तर्क-वितर्कांना अजूनच उधाण आलं. फडणवीसांवर प्रचंड दबाव असल्याचं बोललं जात होतं. काही वेळातच फडणवीसांनी दुसरी घोषणा केली. यानुसार, ते स्वत: राज्याच्या उपमुख्यमंत्रीपदी बसणार असल्याचं जाहीर करण्यात आलं. त्यामुळे पुन्हा चर्चेला सुरुवात झाली. या सर्व प्रकरणावर रिपब्लिक टीव्हीवर बोलताना फडणवीसांनी स्पष्टीकरण दिलं आहे.

“…तर तेव्हा चपराशीही झालो असतो”

“मी का झालो? भाजपानं बनवलं म्हणून. माझं अस्तित्वच भाजपामुळे आहे. भाजपा हटली, तर माझं काहीच अस्तित्व नाहीये. त्यामुळे माझा पक्ष मला जे सांगेल, ते मी करेन. माझ्या पक्षानं तर उपमुख्यमंत्री करून माझा सन्मान केला. त्यांनी मला चपराशी बनायला सांगितलं असतं तरी मी झालो असतो”, असं फडणवीस यावेळी म्हणाले.

“…अन् एकनाथ शिंदेंनी दुसऱ्याच दिवशी चूक मान्य केली”, ‘त्या’ घटनेबाबत देवेंद्र फडणवीसांचा मोठा खुलासा

“मी म्हणालो होतो की मला सरकारमध्ये कोणतंही पद नकोय. मी पक्षाला सांगितलं होतं, यानं असा संदेश जाईल की मी पदासाठी इतका लोभी झालोय की मुख्यमंत्री होतो, उपमुख्यमंत्री झालो. त्यामुळे मला पक्षसंघटनेतलं काम द्या. तसंच ठरलं होतं. पण नंतर आमच्या वरिष्ठ नेत्यांची चर्चा झाली. त्यांना असं वाटलं की आघाडी सरकार आहे. याला चालवायला हवं. त्यासाठी कुणीतरी अनुभवी तिथे असायला हवं. त्यामुळे त्यांनी मला आदेश दिला. पण उपमुख्यमंत्रीपदी बसायचंय हा माझ्यासाठी धक्का होता”, असं फडणवीसांनी सांगितलं.

“पवारांनी आमचा वापर केला, रणनीती आखली अन्…”, पहाटेच्या शपथविधीआधी घडलेल्या ‘डबल गेम’बाबत फडणवीसांचा मोठा खुलासा

“तो निर्णय योग्यच होता”

उपमुख्यमंत्रीपदाचा निर्णय धक्कादायक का होता, यावर फडणवीसांनी यावेळी भाष्य केलं आहे. “त्यावेळी माझी मनस्थिती पक्ष चालवण्याची झाली होती. मग अचानक मला उपमुख्यमंत्री बनायला सांगितलं गेलं. आज जर तुम्ही मला विचाराल, तर मी म्हणेन आमच्या नेत्यांचा निर्णय योग्यच होता. कारण आज मी तिथे आहे, म्हणून आमच्या पक्षाचा अजेंडा व्यवस्थित चालवतोय. आमच्या पक्षाला सांभाळतोय. आमच्या सरकारला माझ्या अनुभवाचा फायदा मिळतो. त्यामुळे त्या वेळी घेतलेला निर्णय योग्यच होता”, असंही फडणवीसांनी यावेळी नमूद केलं.