Video: लाडकी बहीण योजनेसाठी निकष बदलणार का? देवेंद्र फडणवीसांचं विधानसभेत मोठं भाष्य; म्हणाले, “एखादी योजना जर…”

राज्यपालांच्या अभिभाषणावर बोलताना मुख्यमंत्री देवेंद्र फडणवीसांनी विरोधी पक्षांनी केलेल्या भाषणांचा, मांडलेल्या मुद्द्यांचा आणि केलेल्या आरोपांचा आढावा घेतला. त्यावर उत्तरं दिलं. त्याचदरम्यान लाडकी बहीण योजनेसंदर्भात घेण्यात येत असलेले आक्षेप व शंकांबाबत त्यांनी भाष्य केलं.

काय म्हणाले देवेंद्र फडणवीस?

देवेंद्र फडणवीसांनी आपल्या भाषणात महायुतीला मिळालेल्या मोठ्या विजयासाठी मतदारांचे, लाडक्या बहि‍णींचे, मित्रपक्षांचे, कार्यकर्त्यांचे आभार मानले. “नवीन सरकार आल्यानंतर विधानसभेतलं हे माझं पहिलं भाषण आहे. म्हणून मी या विधानसभेतील सर्व सदस्यांचं आणि महाराष्ट्राच्या १४ कोटी जनतेचे आभार मानतो. त्यांनी आमच्या महायुतीला घवघवीत यश दिलं. २३७ आमदार सत्तापक्षाच्या बाजूने निवडून आले”, असं ते म्हणाले. तसेच, “पंतप्रधान नरेंद्र मोदींनी दिलेल्या ‘एक है, तो सेफ है’ या घोषणेला हा विजय म्हणजे जनतेनं दिलेला प्रतिसाद आहे”, असंही देवेंद्र फडणवीस म्हणाले.

“लाडकी बहीण योजनेबाबत शंका ठेवू नका”

दरम्यान, लाडकी बहीण योजनेबाबत उपस्थित करण्यात येणाऱ्या शंका मुख्यमंत्र्यांनी यावेळी फेटाळून लावल्या. “आज या सभागृहाला मी आश्वस्त करू इच्छितो की कोणतीही शंका मनात ठेवू नका. जी आश्वासनं आम्ही दिली आहेत, ज्या योजना आम्ही सुरू केल्या आहेत, त्यातली एकही योजना आम्ही बंद होऊ देणार नाही. ज्या लाडक्या बहि‍णींनी महायुतीवर प्रेम दाखवलं, हे अधिवेशन संपल्याबरोबर डिसेंबरचा हफ्ता त्यांच्या खात्यात आम्ही जमा करत आहोत. काहीच बदल नाहीये”, असं देवेंद्र फडणवीस म्हणाले.

इथे पाहा विधानसभेचं आजचं कामकाज

“नाना (नाना पटोले), मी स्पष्ट करू इच्छितो की लाडकी बहीण योजनेसाठी कोणतेही नवे निकष नाहीत. आता तर सगळ्यांच्याच खात्यात आम्ही पैसे टाकत आहोत. पण प्रथमदर्शनी लक्षात येत आहे की काहींनी चार चार खाती उघडलेली आहेत. जसं समाजात काही चांगल्या प्रवृत्ती असतात, तशाच काही वाईट प्रवृत्तीही असतात. एखादी योजना जर चुकीच्या पद्धतीने कुणी वापरत असेल, तर तो जनतेचा पैसा योग्य प्रकारे वापरला गेला पाहिजे ही तुमची आमची सगळ्यांचीच जबाबदारी आहे. कारण आम्हाला मागे कळलं की माणसानंच ९ खाती उघडली. त्यामुळे त्याला लाडकी बहीण म्हणायचं कसं? बरं लाडका भाऊही म्हणू शकत नाही. बहि‍णींच्या पैशांवर डल्ला मारतो तो लाडका भाऊ कसा?” अशा शब्दांत योजनेचा गैरवापर करणाऱ्यांनाही देवेंद्र फडणवीसांनी सूचक इशारा यावेळी दिला.

Devendra Fadnavis: Video: “अजितदादा, तुम्ही नक्की एक दिवस…”, देवेंद्र फडणवीसांची विधानसभेत मिश्किल टिप्पणी, सभागृहात पिकला हशा!

्

“शेतकरी, युवक, ज्येष्ठांच्या संदर्भात दिलेली आम्ही जी काही आश्वासनं दिली असतील, ती आम्ही पूर्ण करणार आहोत”, असंही त्यांनी नमूद केलं.