GST : शरद पवारांच्या वक्तव्यावर देवेंद्र फडणवीस म्हणतात, “ज्यांना काही समजतच नाही अशी मंडळी…!”

काय म्हणाले शरद पवार?

राष्ट्रवादी काँग्रेसचे अध्यक्ष शरद पवार यांनी आज सकाळी बारामतीमध्ये माध्यमांशी बोलताना जीएसटीच्या मुद्द्यावरून केंद्र सरकारवर निशाणा साधला. केंद्र सरकारने पेट्रोल डिझेलचे दर कमी केले आहेत याबाबत राज्यातील लोकांना काही दिलासा मिळू शकतो का असा प्रश्न विचारल्यावर शरद पवारांनी त्यावर भाष्य केले आहे. “राज्य सरकारने निश्चित दिलासा देऊ असे म्हटले आहे. पण केंद्र सरकारने राज्याचे जीएसटीचे देणं आहे ते लवकर द्यावे म्हणजे लोकांना अशा प्रकारची मदत करण्याचा निर्णय घेता येईल,” असे शरद पवार म्हणाले.

“केंद्र सरकारने राज्याचे जीएसटीचे देणं लवकर द्यावे”; इंधनदर कपातीवरून शरद पवारांची प्रतिक्रिया, राज्य सरकारची पाठराखण

फडणवीसांनी साधला थेट निशाणा!

दरम्यान, याबाबत राज्याचे माजी मुख्यमंत्री आणि विद्यमान विधानसभा विरोधी पक्षनेते देवेंद्र फडणवीस यांना विचारणा केली असता त्यांनी शरद पवारांच्या विधानावर उलट निशाणा साधला. “मी दुर्दैवाने म्हणतो की ज्यांना काही समजतच नाही, अशी मंडळी यात बोलत आहेत. जीएसटीची रक्कम मिळतेच आहे. गेल्या वर्षीही मिळाली, या वर्षीही मिळणार आहे. ती कुठेच जात नाही. पण केंद्रानं ५ रुपये कर कमी केला की आपोआप ७ रुपये टॅक्स कमी होतो. आमचं म्हणणंय तो १०-१२ रुपये करा ना”, असं फडणवीस म्हणाले.