“पंकजा मुंडे सर्व जागांसाठी पात्र आहेत”, फडणवीसांच्या वक्तव्यावर धनंजय मुंडेंचा टोला, म्हणाले…

देवेंद्र फडणवीस यांनी पंकजा मुंडे सर्व जागांसाठी पात्र आहे असं म्हटलं होतं. यावर बोलताना धनंजय मुंडे म्हणाले, “देवेंद्र फडणवीस यांनी पात्र आहे असं म्हटल्यावर इतर कोणीही त्या पात्र नाही असं म्हणण्याचं काही कारण नाही. मात्र, पात्र असणं आणि त्यांच्यावर जबाबदारी देणं यात अंतर आहे. हे अंतर फक्त कोठे अडचणीचं ठरू नये एवढंच आहे.”

“शेवटी हा महाराष्ट्र छत्रपती शिवाजी महाराजांचा आहे”

संभाजीराजेंच्या राज्यसभा उमदेवारीवरून सुरू असलेल्या वादावर बोलताना धनंजय मुंडे म्हणाले, “संभाजीराजेंच्या वडिलांनी खऱ्या अर्थाने आपली भूमिका स्पष्ट केली. त्यानंतर संभाजीराजेंनी देखील ते मान्य केलं. शेवटी हा महाराष्ट्र छत्रपती शिवाजी महाराजांचा आहे. त्यामुळे कुठल्याही पदापेक्षा छत्रपतींचा मान, कुठल्याही खासदारकी, आमदारकी, मंत्रिपदापेक्षाही मोठा आहे, असं माझ्यासारख्या मावळ्याला वाटतं.”

हेही वाचा : फडणवीसांना काय सल्ला देणार विचारलं असता पंकजा मुंडेंनी दिलं उत्तर; म्हणाल्या “काही वाटत असेल तर…”

पंकजा मुंडे काय म्हणाल्या होत्या?

पंकजा मुंडे म्हणाल्या, “राज्यसभेसाठी माझं नाव तर चर्चेत नाही. मात्र, ज्यांना राज्यसभा उमेदवारी मिळाली आहे त्यांच्यासाठी मला आनंद आहे. पियुष गोयल यांना तिकिट मिळेल हे अपेक्षितच होतं. मी विमानात जाण्याआधी या नावांची घोषणा नव्हती. आता राज्यसभा उमेदवारांची यादी जाहीर झालीय. यात विदर्भाला संधी मिळाली आहे. शेतकऱ्यांच्या प्रश्नावर बोलणाऱ्या अनिल बोंडे यांना उमेदवारी मिळाली त्यांनाही शुभेच्छा. मला कोणतीही इच्छा नाही. पक्ष काय ठरवेल यावरच आहे.”