धनगर समाजाचा इचलकरंजीत आरक्षण मागणीसाठी मोर्चा

धनगर समाजाला आरक्षण मिळावे या मागणीसाठी शुक्रवारी इचलकरंजी येथील प्रांताधिकारी कार्यालयावर मोर्चा काढण्यात आला. विधानसभा निवडणुकीची आचारसंहिता लागू होण्यापूर्वी धनगर समाजाचा अनुसूचित जमातीमध्ये समावेश करावा अन्यथा निवडणुकीत समाजाची ताकद दाखवून देऊ, असा इशारा धनगर समाज आरक्षण कृती समितीने दिला. मोर्चात धनगर समाजाची परंपरा दर्शवणारे गजनृत्य, शेळ्या-मेंढय़ांचाही समावेश असल्याने तो लक्षवेधी ठरला.
राज्यभर विखुरलेल्या धनगर समाजाचा अनुसूचित जातीत समावेश करावा, अशी मागणी गेली ६० वष्रे समाजाकडून केली जात आहे. मात्र अद्यापही या समाजाला न्याय मिळाला नाही, अशी समाजाची भावना झाली आहे. धनगर समाजाला आरक्षण देण्याचा निर्णय घेण्यासाठी राज्य शासनाकडून केंद्र शासनाकडे आवश्यक कागदपत्रांची पूर्तता होत नाही. केंद्र शासन आरक्षण देण्यास अनुकूल असले तरी राज्य शासन सकारात्मक भूमिकेत नसल्याने समाजाला आरक्षण मिळावे, या मागणीसाठी धनगर समाज आरक्षण कृती समितीने राज्यभर आंदोलन उभारले आहे. त्याचाच भाग म्हणून इचलकरंजी येथे मोर्चाचे आयोजन करण्यात आले होते. धनगर समाजाची परंपरा दर्शवणारे गजनृत्य, शेळ्या-मेंढय़ा आणि धनगरी ढोलाचा निनाद आणि यळकोट-यळकोट जय मल्हार, अशा घोषणा देत श्रीमंत घोरपडे नाटय़गृहापासून सुरू झालेला हा मोर्चा मुख्य मार्गावरून प्रांत कार्यालयावर आला. शासन आणि आदिवासी मंत्री धनगर समाजाला जाणीवपूर्वक आरक्षणापासून वंचित ठेवत असल्याचा आरोप  या वेळी धनगर समाजाचे नेते विठ्ठल चोपडे यांनी केला.
धनगर समाजाला आरक्षण देण्यास विरोध करणाऱ्या मंत्री महोदयांचा निषेध करून कुरूंदवाडचे नगराध्यक्ष संजय खोत, रामचंद्र डांगे, संदीप कारंडे, नागेश पुजारी, प्रकाश पुजारी, अशोक आरगे, मलकारी लवटे यांच्यासह उपस्थित मान्यवरांनी विधानसभा निवडणुकीपूर्वी आरक्षण मिळावे म्हणून राजकारण बाजूला ठेवून प्रयत्न करण्याचे आवाहन केले. तसेच, समाजाला आरक्षणाचा लाभ मिळेपर्यंत आंदोलनाची तीव्रता वाढवण्याचा निर्धारही या वेळी करण्यात आला. मागण्यांचे निवेदन प्रांताधिकारी अश्विनी जिरंगे यांना देण्यात आले. आंदोलनात शिरोळ, हातकणंगले तालुक्यातील धनगर बांधव सहभागी झाले होते.
 

आणखी वाचा

खासगी व्यक्तींच्या नियुक्तीस मनाई; मुख्यमंत्री देवेंद्र फडणवीस यांच्या निर्णयाने मंत्र्यांना धक्का

Pompeii: २५०० वर्षांपूर्वी भारतीय लक्ष्मी इटलीमध्ये कशी पोहोचली?

पंतप्रधानांचा ‘गोपनीय’ गुरुमंत्र आमदारांकडून, ‘जाहीर’सत्तेचा गर्व न ठेवता आचरण करण्याचा मोदींचा सल्ला

Uday Samant : “शिवसेनेची काँग्रेस झालीय”, भास्कर जाधवांच्या विधानावर उदय सामंतांची प्रतिक्रिया; म्हणाले, “मोठ्या नेतृत्त्वाचं…”

अर्जप्रक्रिया पूर्ण झाल्यावर एमपीएससीने आरक्षण काढून टाकले, आता सर्व पदे खुल्या वर्गासाठी

अन्वयार्थ : सरकारी खातेच जणू…

बेकायदा झोपड्या आता प्राधिकरण रोखणार! खासगी यंत्रणांची मदत घेणार

उदयनराजेंसह वारसांना जमीन महसूल सूट कायम, राज्य शासनाचा निर्णय