धाराशिव : तुळजापूर ड्रग्जविक्री प्रकरणी मुंबईतून आणखी एकाला अटक

तुळजापूर तालुक्यातील तामलवाडी येथे १५ फेब्रुवारी रोजी पोलिसांना एमडी ड्रग्जचा मोठा साठा छापा मारून पकडला होता. तीन महिन्यांपासून पोलीस ड्रग्ज विक्री प्रकरणाचे धागेदोरे शोधण्याचा प्रयत्न करत होते. यापूर्वी दोन वेळा ड्रज विक्री करणाऱ्या रॅकेटचा पर्दाफाश करण्याचा त्यांनी प्रयत्न केला मात्र दोन्ही वेळा आरोपींना सुगावा लागल्यामुळे मुद्देमालासह आरोपींना अटक करण्यात पोलिसांना यश आले नाही. १५ फेब्रुवारी रोजी मिळालेल्या गुप्त माहितीच्या आधारे पोलिसांनी सापळा लावला आणि तुळजापूर शहरासह परिसरात एमडी ड्रग्ज विक्रीचा नंगानाच करणाऱ्या टोळीला मुद्देमालासह गजाआड करण्यात तुळजापूर पोलिसांना यश आले. यावेळी पोलिसांनी अडीच लाख रुपये किमतीच्या ५९ ड्रग्जच्या पुड्या आरोपींकडून हस्तगत केल्या. त्यानंतर तुळजापूर शहर आणि परिसरात एकच गोंधळ माजला होता. पोलिसांवर आरोपींना पाठीशी घातले जात असल्याचा आरोपही करण्यात आला. या प्रकरणाची इत्यंभूत कारवाई आपण दिलेल्या माहितीनुसारच झाली असल्याचे आमदार राणाजगजितसिंह पाटील यांनी सांगितले होते. विधानसभा निवडणुकीच्या कालावधीत तुळजापूर शहर आणि परिसरातील माता-भगिनींनी ड्रग्जचा विळखा तरुणांना कशा पद्धतीने व्यसनाधीन करीत आहे याची भयावह हकीकत आपणास सांगितली होती. ही सर्व माहिती आपण पोलिसांना दिली. त्यानुसारच विशेष पथक नेमणूक पोलिसांनी ड्रग्ज विक्रीचे धागेद्वारे शोधण्यासाठी प्रयत्न सुरू केले असल्याचे आमदार पाटील यांनी म्हटले होते. आता या प्रकरणात मुंबईतून संगीता गोळे या युवतीला अटक करण्यात आली.

या प्रकरणाचा छडा लावत मुंबईतून संगीता वैभव गोळे या ३२ वर्षीय युवतीला मुंबई पोलिसांच्या सहकार्याने तुळजापूर येथील विशेष पोलीस पथकाने तीन दिवसांपूर्वीच गजाआड केले होते. तुळजापुरातील एमडी ड्रग्ज विक्री प्रकरणातील ती मुख्य सूत्रधार असल्याचे तपासात समोर आल्याचे पोलिसांचे म्हणणे आहे. आता तिच्यापाठोपाठ संतोष खोत नावाच्या आणखी एका आरोपीला पोलिसांनी अटक केली आहे. संगीता गोळे हिला न्यायालयासमोर हजर केले असता न्यायालयाने तिला नऊ दिवसांची पोलीस कोठडी सुनावली. आता संतोष खोत याला न्यायालय उद्या किती दिवसांची कोठडी देणार याकडे सर्वांचे लक्ष लागले.