धुळ्याचे भाजपाचे आमदार अनिल गोटे यांनी अखेर पक्ष सदस्यत्वाचा आणि आमदारकीचा राजीनामा दिला आहे. गेल्या काही महिन्यांपासून पक्षविरोधी भूमिका आणि केंद्रीय संरक्षण राज्यमंत्री सुभाष भामरे यांच्यावर सातत्याने ते टीका करत होते. अखेर त्यांनी आज (सोमवार) पक्ष सदस्यत्वाचा राजीनामा प्रदेशाध्यक्ष रावसाहेब दानवे यांच्याकडे तर आमदारकीचा राजीनामा विधानसभा अध्यक्ष हरिभाऊ बागडे यांच्याकडे पाठवला आहे.
धुळे महानगरपालिका निवडणुकीपासून गोटे यांनी स्वपक्षाविरोधात आणि भामरे यांच्याविरोधात आक्रमक भूमिका घेतली होती. नंतर त्यांनी मुख्यमंत्री देवेंद्र फडणवीस यांच्यावरही टीका केली होती. त्याचवेळी ते भाजपा सोडतील, असे बोलले जात होते. अखेर त्यांनी आज पक्षाचा राजीनामा दिला.
धुळे महापालिकेच्या निवडणुकीच्यावेळी भाजपातर्फे विजय संकल्प कार्यकर्ता मेळावा आयोजित करण्यात आला होता. भाजपाच्या विजयी संकल्प मेळाव्यात आमदार अनिल गोटे यांना भाषण करण्यास मज्जाव करण्यात आल्याने गोंधळ उडाला होता. यावेळी अनिल गोटे यांच्या समर्थकांनी जोरदार घोषणाबाजी करत गोंधळ केला होता. अनिल गोटे यांच्या कार्यकर्त्यांनी घोषणाबाजी सुरू केली होती. हा वाद चांगलाच वाढला आणि खुर्च्यांची फेकाफेक झाली. या गोंधळामुळे गोटे यांना न बोलताच मेळाव्यातून बाहेर पडावे लागले होते. भाजपतर्फे विजय संकल्प कार्यकर्ता मेळाव्यातील प्रसंगानंतर अनिल गोटे यांनी धुळ्याच्या महापौरपदावर दावा ठोकला होता. धुळे महापालिकेतही गोटे यांना यश मिळाले नव्हते.
