अजित पवार यांनी उपमुख्यमंत्रीपदाची शपथ घेतली. त्यानंतर राज्यात तिसरा राजकीय भूकंप झाल्याची चर्चा आहे. अजित पवारच नाही तर छगन भुजबळ, दिलीप वळसे पाटील, सुनील तटकरे, प्रफुल पटेल असे एकाहून एक महत्त्वाच्या शिलेदारांनी शरद पवारांची साथ सोडत अजित पवारांसह जाणं पसंत केलं. तुमच्या विश्वासातले इतके लोक तिकडे गेले याचं दुःख वाटतं का? हा प्रश्न विचारला असता शरद पवारांनी उत्तर दिलं आहे. शरद पवारांनी सातारा या ठिकाणी पत्रकार परिषद घेतली त्यात या प्रश्नाला उत्तर दिलं आहे.
प्रश्न: भुजबळ, तटकरे, दिलीप वळसे पाटील ही सगळी विश्वासू मंडळी तुम्हाला सोडून गेल्याचं दुःख वाटतं का?
शरद पवार: अजिबात नाही! मला दुःख वाटत नाही. अशा गोष्टी घडल्यानंतर अंतिम रिझल्ट भले तो आज नसेल सहा महिन्यांनी लागला, वर्षभराने लागला तर तो रिझल्ट या देशातला सर्वसामान्य मतदार देतो. माझा विश्वास आणि सामान्य माणसावर आहे असं म्हणत शरद पवार यांनी विषय संपवला. कारवाई किंवा इतर कुठला विषय आहे त्याचा निर्णय हा जयंत पाटील घेतील असंही शरद पवार यांनी म्हटलं आहे.
हे पण वाचा- “कालपर्यंत खोके म्हणणारे ओके होऊन आता…” नेमकं काय म्हणाले बच्चू कडू?
पक्षाच्या घटनेत मी बदल केले आहेत का हे माझ्या लक्षात नाही. जनरल बॉडीची मिटिंग घेऊन सहा महिने झाले. पक्षाची पुनर्बांधणी हा शिवधनुष्य वगैरे काहीही विषय नाही. लोक तुम्हाला शक्ती द्यायला तयार आहेत. लोकांना तुम्ही जास्तीत जास्त प्रमाणात भेटा तुम्ही सगळं पुन्हा उभं करु शकता असंही शरद पवार यांनी म्हटलं आहे. पंतप्रधान नरेंद्र मोदींनी जाहीर स्टेटमेंट केलं की आमच्या पक्षात भ्रष्टाचारी लोक आहेत. मात्र ज्या अर्थी त्यांना मंत्रिपदाची शपथ देण्यात आली त्यांच्याविषयी पंतप्रधानांनी योग्य माहिती घेतली नाही असंही शरद पवार यावेळी म्हणाले.
प्रफुल पटेल म्हणाले की भाजपासह जाण्यासाठी आम्ही शरद पवारांची मनधरणी करत होतो पण त्यांनी ऐकलं नाही. यावर शरद पवार म्हणाले ही चांगलीच गोष्ट आहे यात वाईट काय? असा प्रश्न विचारतच शरद पवारांनी याचं उत्तर दिलं आहे. कुठे काही चुकीचं होत असेल, अन्याय होत असेल तर त्याविरोधात आवाज उठवायचा असेल तर योग्य ठिकाण सातारा आहे असंही शरद पवार यांनी म्हटलं आहे.
