वाई - पंकजा मुंडे साताऱ्यातील शिंगणापूर दौऱ्यावर असताना त्यांच्या स्वागतासाठी झलेल्या गर्दीमधून चोरट्यांनी पंधरा तोळ्याचे दागिने चोरी करत लाखोंचा ऐवज लंपास केला. पंकजा मुंडे यांचा ताफा थांबताच साताऱ्यातील लोणंद, फलटण शिखरशिंगणापूर मार्गावर कार्यकर्त्यांनी त्यांच्या गाडीभोवती गर्दी केली. या गर्दीचा फायदा उचलत चोरट्यांनी हातचलाखी करत अनेक नेत्यांच्या गळ्यातील चेन लंपास केल्या. यामध्ये भाजपचे डॉ. सुभाष गुळवे यांच्या गळ्यातील चार तोळ्याची सोन्याची चेन, सांगवी (ता. फलटण) येथील महादेव कदम यांच्या गळ्यातील तब्बल साडेदहा तोळ्याची चेन, पोपटराव मिंड यांच्या गळ्यातील एक तोळ्याची चेन लांबवली. हेही वाचा - “नाव बदलून प्रश्न सुटत असतील, तर हुकूमशाहीला…”, रोहित पवारांची मोदी सरकारवर टीका हेही वाचा - आंदोलन चालूच राहणार, मनोज जरांगे-पाटलांची घोषणा; अध्यादेशातील ‘या’ शब्दांमध्ये सुधारणेची मागणी! पंकजा मुंडे यांचा ताफा पुढे गेल्यानंतर आपल्या गळ्यातील चेन गायब झाल्याचे संबंधितांच्या लक्षात आले. यावेळी त्या ठिकाणी उपस्थित पोलिसांच्या कानावर त्यांनी चोरीची कल्पना दिली, मात्र अज्ञात चोरटा सापडला नाही. याबाबत रात्री उशिरापर्यंत शहर पोलीस ठाण्यात फिर्याद नोंदविण्याची प्रक्रिया सुरू होती. यावेळी उपस्थित कार्यकर्त्यांनी काढलेले फोटो तसेच व्हिडीओ तसेच सीसीटीव्ही फुटेज तपासण्याचे काम पोलिसांनी सुरू केले आहे.
