“तुझ्यासारखा हमाल, भंगार विकणारा…”, भाजपा आमदारावर एकनाथ खडसेंचा संताप

एकनाथ खडसे यांनी काही वेळापूर्वी प्रसारमाध्यमांशी बातचित केली. यावेळी माध्यमांच्या प्रतिनिधींनी त्यांना मंगेश चव्हाणांनी दिलेल्या इशाऱ्यावर प्रतिक्रिया विचारली. त्यावर एकनाथ खडसे म्हणाले, तुला (मंगेश चव्हाण) कोणी अडवलं बाबा? सांगतो कशाला? ऑडिट कर, फॉडिट कर, काय करायचं ते कर. मी बापजाद्यांपासून श्रीमंत आहे. तुझ्यासारखा हमाल आणि भंगार विकणारा मी होतो का? मी एका चांगल्या घरचा माणूस आहे. तुला काय ऑडिट करायचं ते कर.

एकनाथ खडसे मगेश चव्हाणांना उद्देशून म्हणाले, तुला जे ऑडिट करायचं आहे ते कर, आत्ता सरकार तुझं आहे, कुठलं ऑडिट करायचं ते कर. तुला ज्या भानगडी करायच्या असतील त्या कर. ईडी लावलीय, आयकर विभाग लावला, आणखी तुला काय बघायचं आहे ते बघ. तुझी काय कुवत आहे? समाजात तुझी किंमत काय? तुला समाजात काय मान्यता आहे?

हे ही वाचा >> Jaipur Mumbai Express Firing : “हल्लोखोर आरपीएफ जवान भाजपाचा…”, ‘तो’ व्हिडीओ शेअर करत असदुद्दीन ओवैसींचा टोला

एकनाथ खडसे म्हणाले, एवढी शक्ती जरा लोकांचे प्रश्न सोडवण्यासाठी लावा. तुमच्यात दम असेल तर कापसाला भाव देऊन दाखवा ना, त्याबद्दल बोलायला तुम्ही तयार नाही. उगाच बाकिच्या भानगडी काय काढत बसता. तुम्हाला काय काढायचं ते काढा. तुम्हाला कोणी अडवलंय?