Eknath Shinde : राज ठाकरेंच्या भेटीनंतर उपमुख्यमंत्री एकनाथ शिंदेंची पहिली प्रतिक्रिया; म्हणाले, “तुमचा विश्वास बसणार नाही,पण….”

पोटात एक आणि ओठात एक असं करणारे आम्ही नाही-एकनाथ शिंदे

यानंतर एकनाथ शिंदे म्हणाले, “सरकारचं कामकाज कसं चाललंय? मुंबईतल्या रस्त्यांचं काम कुठवर आलंय या विकासाच्या गोष्टींवरही चर्चा झाली. राजकीय चर्चा कुठलीही झाली नाही. गप्पागोष्टी आणि बाळासाहेबांच्या आठवणींना उजाळा देण्यात वेळ कसा गेला समजलं नाही ही वस्तुस्थिती आहे. आमच्या भेटीचा राजकीय अर्थ काढू नका. तुम्हाला विश्वास बसणार नाही पण विश्वास ठेवा. आम्ही मोकळेपणाने बोलणारे लोक आहोत. मनात एक, पोटात एक, ओठात एक असं आम्ही करत नाही. जे बोलतो ते थेट बोलतो.”

आम्हाला निवडणुकीची वेगळी तयारी करावी लागत नाही-एकनाथ शिंदे

“महायुतीचं सरकार आहे, आम्ही महायुतीत आहोत. येणाऱ्या प्रत्येक निवडणुका महायुती जिंकेल असं मी तर जाहीरपणे अनेकदा सांगितलं आहे. विधानसभेच्या निवडणुकीत महायुतीने जे काम केलं त्याची पोचपावती मिळाली. यापुढेही येत्या निवडणुकांमध्ये महायुती चांगलं यश मिळवेल. त्यामुळे महायुती आहेच. निवडणुका नाहीत, त्यामुळे निवडणुकांवर चर्चा करायची आत्ताची वेळ नव्हतीच. निवडणुका आल्या तरीही आम्ही तयारीतच असतो. निवडणुका डोळ्यांसमोर ठेवून आम्ही काम करत नाही. निवडणुका आल्या की काम करायचं, कार्यालयं उघडायची असं आम्ही करत नाही. त्यामुळे निवडणुका असुद्या नसुद्या, आम्ही लोकांची कामं करत असतो. निवडणुकांची वेगळी तयारी आम्हाला करावी लागत नाही.” असा टोला एकनाथ शिंदेंनी उद्ध ठाकरेंना लगावला.

निवडणुका नाहीत त्यामुळे…

“आता निवडणुका नाहीत त्यामुळे निवडणुकांचा माहोल तयार झालं की मग युती, महायुती यांची चर्चा होते. आज राज ठाकरेंशी सदिच्छा भेट घेतली. बाळासाहेब ठाकरेंच्या आठवणींना आम्ही दोघांनी उजाळा दिला. आम्ही पुन्हा त्या काळात गेलो. भेटीत काही लपवून ठेवण्याचं कारण नाही. बाळासाहेबांच्या ज्या जुन्या आठवणी, केलेलं काम, त्या काळातल्या घटना या सगळ्यांना आम्ही उजाळा दिला. काही चिंता करु नका. काही असेल तर तुम्हाला आम्ही नक्की कळवू” असंही एकनाथ शिंदेंनी म्हटलं आहे.