Eknath Shinde On Uddhav Thackeray : नागपूरमधील विधिमंडळाच्या हिवाळी अधिवेशनाची सांगता झाली. यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी पत्रकार परिषद घेत या अधिवेशनात झालेल्या निर्णयाची माहिती दिली. तसेच विधिमंडळाच्या हिवाळी अधिवेशनात माजी मुख्यमंत्री उद्धव ठाकरे यांनी देखील हजेरी लावली होती. यावरून उपमुख्यमंत्री एकनाथ शिंदे यांनी नाव न घेता खोचक टीका केली. “काहींनी मुख्यमंत्री पदाचा राजीनामा देताना आमदारकीचा राजीनामा देणार असल्याचं म्हटलं होतं. मात्र, आता ते आमदारकी वाचवण्यासाठी पर्यटक म्हणून विधानभवनात येऊन गेले”, असा टोला एकनाथ शिंदे यांनी उद्धव ठाकरेंना लगावला.
एकनाथ शिंदे काय म्हणाले?
“गेले आठ दिवस सुरु असलेलं हिवाळी अधिवेशन आज संपलं. या अधिवेशनात चांगले निर्णय घेतले गेले आहेत. खरं तर आमचं सरकार नव्याने स्थापन झालं नाही तर आमची टीम तिच आहे फक्त मॅच नवीन आहे. देवेंद्र फडणवीस यांच्या नेतृत्वात महायुती सरकारचं कामकाज सुरु झालं आहे. अधिवेशनाचा वेळ कमी असला तरी सर्व कामकाज पूर्ण झालं. अधिवेशनात पुरवणी मागण्या देखील मान्य झाल्या. आमच्या सरकारने ज्या योजना सुरु केल्या त्या योजना सुरु ठेवण्यासाठी जी आर्थिक मदत लागते त्यासाठी तरतूद करण्यात आलेली आहे. या सर्व योजना सुरु राहतील. त्या बंद होणार नाहीत”, अशी माहिती उपमुख्यमंत्री एकनाथ शिंदे यांनी दिली.
“विरोधकांनी जे प्रश्न उपस्थित केले त्या प्रश्नांना आम्ही उत्तरं दिली. अधिवेशन काळात मंत्रिमंडळाचा विस्तारही झाला. विधानपरिषदेच्या सभापतींचीही निवड झाली. तसेच पुणे विमानतळाला जगद्गुरु संत तुकाराम महाराजांचे नाव देण्याचा प्रस्तावही मंजूर झाला आणि आम्ही हा प्रस्ताव केंद्राला पाठवला. तसेच विरोधकांनी प्रश्न सभागृहात न मांडता फक्त माध्यमांसमोर आणि सभागृहाच्या पायऱ्यांवर मांडले. नव्या सरकारला आम्ही गती देण्याचा प्रयत्न करणार आहोत. महायुती सरकारची जी गती होती, ही गती अधिक वेगवान झाली आहे”, असंही उपमुख्यमंत्री एकनाथ शिंदे यांनी म्हटलं.
“कोणत्याही गुन्हेगारांना पाठीशी घालण्याचं काम आमचं सरकार करणार नाही. तसेच काही लोक म्हणाले की आमचे मंत्री प्रश्नांची उत्तरं देत नाहीत. तसेच काहीजण आले आणि अधिवेशन विनोदी असल्याची टीका करून गेले. मात्र, काहींनी जेव्हा मुख्यमंत्री पदाचा राजीनामा दिला होता, तेव्हा आमदारकीचा राजीनामा देऊ असंही म्हटलं होतं. पण ती आमदारकी वाचवण्यासाठी आता फक्त पर्यटक म्हणून इकडे अधिवेशनात येऊन गेले. खरं तर अधिवेशनाला विनोदी म्हणणं म्हणजे हाच मोठा विनोद आहे”, असं म्हणत नाव न घेता उपमुख्यमंत्री शिंदे यांनी उद्धव ठाकरेंवर टीका केली.
