‘बॉइज टाऊन’मध्ये वनौषधी वाटिकेसाठी वनविकास महामंडळाची तयारी

वनविकास महामंडळ आणि नव्याने स्थापन झालेला ‘टुरिझम फॅन क्लब’ यांच्या वतीने वन दिनानिमित्त येथील बॉइज टाऊन शाळेत २५ दुर्मीळ वनौषधींची लागवड करण्यात आली. याप्रसंगी वनविकास महामंडळाचे नाशिक विभागीय मुख्य वनसंरक्षक तथा महाव्यवस्थापक एच. एन. पाटील यांनी या शाळेच्या प्रांगणात वनौषधी लावण्यासाठी पुरेशी जागा उपलब्ध असल्यामुळे येथे वनौषधी वाटिका विकसित करण्याची महामंडळाची तयारी असल्याचे नमूद केले. शाळेच्या सभागृहात वन दिनानिमित्त विद्यार्थ्यांमध्ये जनजागृती करण्यात आली. दुर्मीळ वनस्पती तसेच आजारांवर गुणकारी असलेल्या वनौषधींबाबत माहिती अधिकाऱ्यांनी दिली. आयुर्वेदिक वनौषधी, निसर्गोपचार पद्धतीबाबत विद्यार्थ्यांना माहिती देऊन वनविकास महामंडळाचे विभागीय व्यवस्थापक जी. एस. गौड आणि साहाय्यक व्यवस्थापक बी. एम. घोरपडे, डी. एस. सावदेकर यांनी वन दिनाचे महत्त्व बिंबविले. संबंधित वनस्पती कोणत्या आजारावर उपयुक्त आहे याची माहिती यानिमित्ताने विद्यार्थ्यांना मिळाली. विविध वक्त्यांनी वनसंवर्धन, जलसाक्षरता, पर्यटन विकास, पर्यावरणाचा समतोल, निसर्ग संरक्षण अशा विविध विषयांवर विचार मांडले. बॉइज टाऊन शाळेत लागवड करण्यात आलेल्या वनौषधींमध्ये आवळा, हिरडा, बेहडा, धावडा, मेहंदी, सादडा, निरगुडी, अडुळसा, चंदन, मोह, शिरस, करंज, खेर, अर्जुन सादडा, सीताअश्वक, सेंद्रिय मुचुकुंद, रक्तरोहिडा, कदंब, साग, बेल आदी वनस्पतींचा समावेश आहे. लागवड झालेल्या वनौषधींच्या शेजारी झाडाच्या माहितीचा फलक लावण्यात येणार आहे. या वेळी टुरिझम फॅन क्लबचे अध्यक्ष प्रा. उमेश पठारे, सदस्य प्रा. संध्या तोडकर, संजय अमृतकर आदी उपस्थित होते.