आदित्य ठाकरेंना मंत्री केलं तेव्हाच एकनाथ शिंदेंना पोटदुखी झाली असं म्हणत किशोरी पेडणेकर यांनी मुख्यमंत्री एकनाथ शिंदेंवर टीका केली आहे . जालन्यात शिवगर्जना मेळाव्याचं आयोजन करण्यात आलं होतं. त्यावेळी त्या कार्यकर्त्यांना संबोधित करत होत्या. धर्मवीर सिनेमा बनवून सिम्पथी मिळवण्याचं काम मिंधेंनी केलं. म्हणूनच उद्धव ठाकरेंनी इंटरव्हलनंतर धर्मवीर सिनेमा पाहिला नाही. यावेळी आदित्य ठाकरेंना जेव्हा मंत्री केलं तेव्हा खऱ्या अर्थानं यांना पोटदुखी झाली असल्याचं वक्तव्य किशोरी पेडणेकर यांनी केलं.
शिवसंपर्क अभियानाच्या माध्यमातून आम्ही संपर्क करतो आहोत असं किशोरी पेडणेकर यांनी सांगितलं. तसंच उद्धव ठाकरे आणि एकनाथ शिंदे म्हणजे राम आणि श्याम आहेत असं वक्तव्य ओवैसी यांनी केलं होतं. त्यावरही किशोरी पेडणेकरांनी उत्तर दिलं. ओवैसी काय म्हणतात ते मला महत्त्वाचं वाटत नाही. पक्षात असताना ते राम आणि श्यामच होते. पण ते नातं कुणी बिघडवलं हे सगळ्यांना माहित आहे असंही किशोरी पेडणेकर यांनी म्हटलं आहे.
आनंद दिघे यांच्याविषयी आमच्या मनात खूप आदर आहे. आम्ही जवळून आनंद दिघेंना पाहिलं आहे. दोन-तीन निवडणुका त्यांच्यासोबत आम्ही काम केलं आहे. मात्र आनंद दिघेंचं नाव घेऊन, आनंद दिघेंच्या आयुष्यात न घडलेल्या गोष्टी सिनेमातून दाखवून मिंधेंनीच केल्या. उद्धव ठाकरेंच्या या सगळ्या गोष्टी लक्षात आल्या त्यामुळेच इंटरव्हलनंतर उद्धव ठाकरे उठून गेले. उद्धव ठाकरेंनी आदित्य ठाकरेंना मुलगा आहे म्हणून तिकिट दिलं नाही. आदित्य ठाकरेंनी स्वतःची गुणवत्ता सिद्ध केली. त्यांनी किती कष्ट घेतले ते आम्हाला माहित आहे असंही किशोरी पेडणेकर यांनी म्हटलं आहे. सर्वांच्या आग्रहाखातर आदित्य ठाकरेंना तिकिट देण्यात आलं. त्यानंतरही आदित्य ठाकरेंनी जे काम केलं त्यामुळेच त्यांना मंत्रीपद दिलं.
आदित्य ठाकरेंना मंत्री केलं आणि एकनाथ शिंदेंच्या पोटात दुखू लागलं. आदित्य ठाकरे हे चाणाक्ष आहेत असंही किशोरी पेडणेकर यांनी म्हटलं आहे.
