प्राजक्ता माळीच्या कार्यक्रमाला त्र्यंबकेश्वर मंदिराच्या माजी विश्वस्तांचा विरोध; म्हणाल्या, “चुकीचा पायंडा…”

महाशिवरात्र उत्सव २०२५ च्या अनुषंगाने मागील वर्षी सुरू करण्यात आलेल्या सोहळ्यानुसार यावर्षी देखील २५ फेब्रुवारी रोजी हळदीचा समारंभ होणार आहे. त्याअनुषंगाने मंदिराला फुलांची आकर्षक आरास करण्यात येईल. मंगळवारी सायंकाळी सातपासून रात्री नऊपर्यंत बासरी प्रशिक्षण वर्गाचा बासरी वादन कार्यक्रम होईल. परंपरेनुसार बुधवारी दुपारी तीन वाजता श्रीत्र्यंबक राजाची पालखी मंदिरातून निघेल. सकाळी देवस्थानमध्ये लघुरुद्र तसेच अन्य धार्मिक कार्यक्रम होतील. नियोजित मार्गावरून पालखी पुन्हा देवस्थानमध्ये येईल. या दरम्यान शिव तांडव ग्रुपतर्फे नृत्याचे सादरीकरण मंदिरासमोर तसेच मुख्य दोन चौकांमध्ये करण्यात येणार आहे. सायंकाळी आठ वाजता नटरंग अकादमीच्या वतीने शिवार्पणमस्तु नृत्य कार्यक्रमाची प्रस्तुती अभिनेत्री प्राजक्ता माळी आणि सहकलाकार सादर करणार आहेत. 

माजी विश्वस्त काय म्हणाल्या?

या कार्यक्रमासंदर्भात मंदिराच्या माजी विश्वस्त ललिता शिंदे म्हणाल्या, “महाशिवरात्रीचा अतिशय पवित्र दिवस आहे. येथे धार्मिकच कार्यक्रम झाले पाहिजेत. प्राजक्ता माळी शिवस्तुती सादर करणार असतील, तरी त्याचा पुनर्विचार झाला पाहिजे. कारण मी स्वतः या मंदिराची माजी विश्वस्त आहे. शास्त्रीय नृत्य, कथ्थक नृत्य ठेवलं पाहिजे. पण सेलिब्रिटिंना आणून येथे एक वेगळाच पायंडा त्र्यंबकेश्वर देवस्थानने सुरू केलाय. हे चुकीचं घडतंय.”

दरम्यान, फुलवंती हा तिचा चित्रपट प्रदर्शित झाल्यानंतर प्राजक्ता माळीने बारा ज्योतिर्लिंगाचे दर्शन घेतले होते. या चित्रपटाच्या यशस्वीतेनंतर तिने बारा ज्योतिर्लिंगाचे आशीर्वाद घेऊन तिच्या पुढच्या वाटचालीला सुरुवात केली होती. त्र्यंबकेश्वर येथील तिच्या कार्यक्रमाला विरोध झाल्यानंतर तिची भूमिका काय याविषयी अधिकृत माहिती समोर आलेली नाही.