बुलढाण्यामध्ये एका विचित्र घटनेत महाराष्ट्र परिवहन मंडळाच्या बसच्या पत्र्यामुळे दोन तरुणांचे हात कापले गेले आहेत. मलकापूर-पिंपळगाव मार्गावरील एसटी बसचा तुटलेला पत्रा लागल्याने दोन तरुणांचे हात कापले असून दोघांचीही प्रकृती चिंताजनक असल्याची माहिती समोर आली आहे.
मिळालेल्या माहितीनुसार बस चालकच्या आसनाच्या मागील रांगेमधील पत्रा तुटल्याने तो बाहेर आला होता. ही बस मलकापूरवरुन पिंपळगावला जाणाऱ्या मार्गावर असतानाच पोलीस प्रवेश परीक्षेसाठी सराव करणारे काही तरुण मॉर्निंग वॉकला जाताना हाताचे व्यायम करत रस्त्याच्या बाजूने संथ गतीने धावत होते. त्याचवेळी ही बस बाजूने गेली आणि दोन तरुण गंभीर जखमी झाले. या तरुणांपैकी एकाचा हात अगदी तुटून खाली पडल्याचं वृत्त ‘एबीपी माझा’ने दिलं आहे.
या विचित्र अपघानंतर एकच गोंधळ उडाला. मात्र बस चालकाने प्रसंगावधान दाखवत दोन्ही जखमी तरुणांना मलकापूर रुग्णालयामध्ये उपाचरांसाठी दाखल केलं. दोघांची प्रकृती गंभीर असल्याचं सांगितलं जात असून मोठ्या प्रमाणात रक्तस्त्राव झाला आहे. त्यानंतर बस चालकाने ही बस मलकापूर पोलीस स्थानकामध्ये नेली आणि घडलेला सर्व प्रकार पोलिसांना सांगितला. पोलीस घटनास्थळी पोहचले असून प्रकरणाचा पंचनामा सुरु आहे. दरम्यान या तरुणांची प्रकृती अधिक खालावल्याने त्यांना जळगावमधील मोठ्या रुग्णालयात हलवण्याचा निर्णय घेण्यात आल्याची माहिती समोर आली आहे.
