सांगली: कर्नाटक विधानसभा निवडणुकीच्या पार्श्‍वभूमीवर सांगली पोलीसांनी विविध ठिकाणी घेतलेल्या झाडाझडतीमध्ये १७ जिवंत काडतुसासह देशी बनावटीची सात पिस्तुले, बाराशे ग्रॅम गांजा, २२८ नशेच्या गोळ्या असा ९ लाख ६७ हजाराचा ऐवज जप्त करीत सहा आरोपींना गजाआड केले. शनिवारी रात्री पोलीसांच्या दोन पथकांनी सांगली, मिरज शहरात एकाचवेळी झाडाझडतीची मोहिम राबवली असल्याची माहिती स्थानिक गुन्हे अन्वेषण विभागाचे पोलीस निरीक्षक सतीश शिंदे यांनी रविवारी दिली. जिल्ह्याच्या मिरज व जत तालुययाच्या सीमा कर्नाटक लगत असल्याने या विधानसभा निवडणुकीच्या पार्श्‍वभूमीवर संशयितांची झाडाझडती घेण्याचे आदेश अधिक्षक बसवराज तेली यांनी दिले होते. यानुसार पोलीस निरीक्षक शिंदे यांच्या मार्गदर्शनाखाली स्थानिक गुन्हे अन्वेषण विभागाची सहायक निरीक्षक संदीप शिंदे व प्रशांत निशाणदार यांच्या नेतृत्वाखाली दोन पथके तैनात करण्यात आली होती. आणखी वाचा-‘ओटीपी-पासवर्ड’ दिला नाही, तरी गमावले सव्‍वा लाख रुपये या दोन पथकानी सांगली शहर, विश्रामबाग, महात्मा गांधी चौक आणि मिरज शहर या पोलीस ठाण्याच्या हद्दीमध्ये संशयित आरोपींची झाडाझडती घेतली. यावेळी सांगलीमध्ये शांताराम शिंदे, सौरभ कुकडे, महात्मा गांधी चौक पोलीस ठाण्याच्या हद्दीतून राहूल माने, मिरज शहर पोलीस ठाण्याच्या हद्दीतून वैभव आवळे व सुरेश राठोड आणि विश्रामबाग पोलीस ठाण्याच्या हद्दीतून सूरज महापुरे या सहा जणांना अटक केली. या सर्वाकडून सात देशी बनावटीची पिस्तुले आणि १७ जिवंत काडतुसे मिळाली आहेत. तर राहूल माने याच्याकडून १ हजार २१८ गॅ्रम वाळलेला गांजा आणि नशेसाठी वापरण्यात येत असलेल्या निट्रावेट-१० आणि निट्रोसम आर-१० या कंपनीच्या २२८ गोळ्या आढळल्या आहेत. गांजा व गोळयांची तो विक्री करीत असतानाच पोलीसांनी त्याला रंगेहात अटक केली. तर गुन्ह्यासाठी वापरण्यात येणारी स्विप्ट डिझायर ही मोटारही जप्त करण्यात आली आहे. या प्रकरणी संबंधित संशयितांना अटक करून पोलीस ठाण्यात चार वेगवेगळे गुन्हे दाखल करण्यात आले आहेत.
