उक्शी आणि संगमेश्वर स्थानकांदरम्यान मालगाडीचे डबे घसरल्याने सोमवारी सकाळपासून कोकण रेल्वेची वाहतूक पूर्णपणे बंद झाली. यामुळे उन्हाळी सुट्टीच्या हंगामात कोकणाकडे निघालेल्यांची दैना झाली. रेल्वेमार्ग दुरुस्त करण्यासाठी दोन दुरुस्ती गाडय़ा आणि एक वैद्यकीय मदत करणारी गाडी तसेच दोनशे कामगारांचा ताफा रात्री उशिरापर्यंत काम करत होता. मात्र, मार्ग सुरू न होऊ शकल्याने मंगळवारीही कोकण रेल्वेची वाहतूक काही काळ विस्कळीत राहण्याची भीती आहे.
रत्नागिरीपासून १९ किमी अंतरावरील उक्शी रेल्वेस्थानकानजीकच्या बोगद्याजवळ मालगाडीच्या ४१ डब्यांपैकी चार ते पाच डबे सकाळी सव्वा आठच्या सुमारास रुळांवरून घसरले. त्यामुळे स्लिपरचे तुकडे होऊन रुळांनाही तडे गेले. परिणामी कोकण रेल्वेवरील संपूर्ण वाहतूक बंद पडली. या घटनेची माहिती मिळाल्यानंतर कोकण रेल्वेचे अधिकारी तातडीने घटनास्थळी रवाना झाले. या दुर्घटनेमुळे कोकण रेल्वेमार्गावर धावणाऱ्या काही गाडय़ा विविध स्थानकांत रद्द करण्यात आल्या, तर काही गाडय़ा रवानाच झाल्या नाहीत. काही गाडय़ा वेगळ्या मार्गाने रवाना करण्यात आल्या. या वेळी मार्गावर असणाऱ्या सावंतवाडी-दिवा पॅसेंजर, सावंतवाडी-दादर खास गाडी, दादर-रत्नागिरी एक्स्प्रेस या गाडय़ांमधील प्रवाशांची एसटी बसेसमधून नियोजित ठिकाणी नेण्याची व्यवस्था करण्यात आली.
या अपघातामुळे उन्हाळी सुटय़ांच्या मोसमात कोकणात निघालेल्या चाकरमान्यांची पंचाईत झाली. दादर, मुंबई छत्रपती शिवाजी टर्मिनस आदी स्थानकांमधून थेट कोकणात जाणाऱ्या गाडय़ा रद्द करण्यात आल्याच्या उद्घोषणा सुरू असल्याने प्रवासी गावी जाण्यासाठी इतर मार्गाचा शोध घेत होते. त्यामुळे खासगी बस चालकांकडे आणि एसटीकडे गर्दीचा ओघ होता.
कोकण रेल्वेवर आजही गोंधळ?
उक्शी आणि संगमेश्वर स्थानकांदरम्यान मालगाडीचे डबे घसरल्याने सोमवारी सकाळपासून कोकण रेल्वेची वाहतूक पूर्णपणे बंद झाली.
या बातमीसह सर्व प्रीमियम कंटेंट वाचण्यासाठी साइन-इन करा
या बातमीसह सर्व प्रीमियम कंटेंट वाचण्यासाठी साइन-इन करा
Already have an account? Sign in
First published on: 15-04-2014 at 03:27 IST
मराठीतील सर्व महाराष्ट्र बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Goods train derails cancellations diversions on konkan railway route
