सांगली : गणपती बाप्पा मोरया, मंगलमूर्ती मोरयाच्या गजरात आणि आबालवृद्धांच्या आनंदात शनिवारी गणेशाचे मोठ्या थाटात आगमन झाले. दुपारपर्यंत घरगुती गणेशाची प्रतिष्ठापना केल्यानंतर सायंकाळपासून ध्वनी मर्यादेचे सर्रास उल्लंघन करणाऱ्या ध्वनिक्षेपकांच्या भिंती, ढोल-ताशांच्या निनादात सार्वजनिक मंडळाच्या स्वागत मिरवणुका सुरू झाल्या. सांगली संस्थानच्या गणेशाची विधिवत राजवाड्यातील दरबार हॉलमध्ये प्रतिष्ठापना करण्यात आली.
यंदा पाऊसकाळ चांगला असल्याने गणेशोत्सव थाटात साजरा होत असून गणेशभक्तांच्या उत्साहाला उधाण आले आहे. सांगली शहरातील पुष्पराज चौक, गणपती पेठ, कुंभार गल्ली, विश्रामबाग गणेश मंदिर आदी ठिकाणी गणेशमूर्तीचे स्टॉल लावण्यात आले होते. सकाळपासून श्रींची मूर्ती घरी नेण्यासाठी भाविकांनी याठिकाणी गर्दी केली होती. गणपती बाप्पा मोरया, मंगलमूर्ती मोरयाच्या जयघोषात गणरायाचे घरोघरी आगमन झाले.
सांगलीच्या श्री गणपती पंचायतन संस्थांनच्या सरकारी गणपती उत्सवाला आजपासून मोठ्या भक्तीमय वातावरणात सुरुवात झाली आहे. सकाळी गणेश मंदिरातून दरबार हॉलपर्यंत सरकारी गणपतीच्या श्रीची पालखीतून मिरवणूक काढण्यात आली. त्यानंतर राजवाडा परिसरातील दरबार हॉल येथे सरकारी गणपतीची प्रतिष्ठापना करण्यात आली. गणपती संस्थानचे युवराज आदित्यराजे पटवर्धन यांच्या हस्ते सरकारी गणपतीची प्रतिष्ठापनेची आरती करण्यात आली. यावेळी श्रीमंत विजयसिंहराजे पटवर्धन, राणीसाहेब राजलक्ष्मी पटवर्धन आणि राजकन्या पौर्णिमा पटवर्धन, व्यवस्थापक जयदीप अभ्यंकर यांची विशेष उपस्थिती होती. आजपासून सरकारी संस्थानच्या गणपती उत्सवाला भक्तीमय वातावरणात सुरुवात झाली आहे. या पाच दिवसाच्या उत्सवामध्ये संगीतमय कार्यक्रम, पानसुपारी आणि विसर्जन मिरवणूक असे कार्यक्रम आहेत.
हेही वाचा – अहमदनगर : भंडारदरा पाणलोटातील घाटघरला आजपर्यंत पडला ५ हजार ३८ मिमी पाऊस
दुपारपर्यंत घरगुती गणेशमूर्तीची प्रतिष्ठापना झाल्यानंतर सार्वजनिक मंडळाच्या गणेश आगमन मिरवणुकांना जोषात सुरुवात झाली. सांगली, मिरज व कुपवाड या तीन शहरांत ७५० हून अधिक सार्वजनिक मंडळांची यावेळी प्रतिष्ठापना होत आहे. मिरवणुकीमध्ये ढोल-ताशांसह बेंजोंचा समावेश तर होताच पण याचबरोबर ध्वनी मर्यादेचे उल्लंघन करणाऱ्या ध्वनिक्षेपकांच्या भिंतींचाही वापर करण्यात आला. श्रींच्या स्वागत मिरवणुका रात्री उशिरापर्यंत सुरू होत्या. गणेश उत्सवात होणारी गर्दी लक्षात घेऊन शहरातील काही मार्ग पोलिसांंनी वाहतुकीसाठी बंद केले होते. तर ठिकठिकाणी पोलीस बंदोबस्त ठेवण्यात आला होता.
