कोकणात गटबाजीने काँग्रेसला पोखरले

कोकणात आधीच दुबळा झालेल्या काँग्रेस पक्षाला विधानसभा निवडणुकीच्या तोंडावर गटातटाच्या राजकारणाने पोखरले आहे.  नुकत्याच झालेल्या लोकसभा निवडणुकीत देशातील अन्य भागांप्रमाणेच येथेही युतीचे उमेदवार विनायक राऊत प्रचंड मताधिक्याने निवडून आले. त्यानंतर काँग्रेस पक्षांतर्गत मतभेद उफाळून आले. सिंधुदुर्ग जिल्ह्य़ातील राणे यांचे कट्टर समर्थक आमदार राजन तेली यांनी त्याबाबतच्या वादांना प्रथम तोंड फोडले. त्यानंतर रत्नागिरी जिल्ह्य़ातील राणे यांचे समर्थक माजी आमदार सुभाष बने आणि गणपत कदम यांनी शिवसेनेची वाट धरली. सिंधुदुर्ग जिल्ह्य़ातील राणे यांचे आणखी एक खंदे समर्थक काका कुडाळकर यांनीही नुकताच काँग्रेस पक्षाचा राजीनामा दिला असून ते शिवसेनेत प्रवेश करण्याची शक्यता वर्तवली जात आहे. सिंधुदुर्गच्या तुलनेत रत्नागिरी जिल्ह्यात काँग्रेस आधीच दुबळी आहे. त्यातल्या त्यात चिपळूण तालुक्यात स्थानिक कार्यकर्त्यांच्या बळावर राणेंनी काँग्रेस पक्षाची ताकद वाढवण्याचा प्रयत्न केला होता. पण आता चिपळूण तालुका काँग्रेस पक्षाचे अध्यक्ष संदीप सावंत यांच्या विरोधात पक्ष कार्यकर्त्यांनी मोठय़ा प्रमाणात तक्रारी केल्यामुळे तेथेही पक्षांतर्गत वाद चव्हाटय़ावर आले आहेत. सावंत यांच्या मनमानी कारभारामुळे पक्षाची बदनामी होत असून, पक्षाचे पदाधिकारी व कार्यकर्त्यांचे खच्चीकरण ते करीत असल्याने त्यांच्या नेतृत्वाखाली काम करणे असह्य़ झाले असल्याची तक्रार तालुक्यातील अडीचशेहून जास्त काँग्रेस पदाधिकारी व कार्यकर्त्यांनी एका निवेदनाद्वारे केली आहे.
पक्षाचे प्रदेशाध्यक्ष माणिकराव ठाकरे, राज्याचे उद्योगमंत्री नारायण राणे, जिल्हाध्यक्ष रमेश कीर आणि माजी खासदार नीलेश राणे यांना देण्यात आलेल्या निवेदनावर जिल्हा सचिव रामदास राणे, शहराध्यक्ष परिमल भोसले, उपनगराध्यक्ष लियाकत शाह, माजी नगराध्यक्ष शांताराम बुरटे इत्यादींच्या सह्य़ा आहेत. लोकसभा निवडणुकीतील पराभवाचाही ठपका या निवेदनात सावंत यांच्यावर ठेवण्यात आला आहे. त्यामुळे तालुक्यातील काँग्रेस पक्षांतर्गत वाद विकोपाला गेले असून या दोन गटांपैकी कोणता तरी एक गट पक्षातून बाहेर पडण्यासारखी स्थिती निर्माण झाली आहे.   
राज्यात १९९५ मध्ये युतीचे सरकार आल्यानंतर कोकणात काँग्रेसची मोठी पडझड झाली होती. पण शिवसेनेचे तत्कालीन ज्येष्ठ नेते नारायण राणे यांच्यासह कोकणातील पाच आमदारांनी २००५ मध्ये काँग्रेस पक्षात प्रवेश केल्यानंतर पुन्हा एकवार या टापूत काँग्रेस पक्षाला अनुकूल वातावरण निर्माण झाल्याचे चित्र होते. त्याचबरोबर राष्ट्रवादी काँग्रेसनेही कोकणात बऱ्यापैकी शिरकाव केला. २००९ च्या लोकसभा निवडणुकीत रत्नागिरी-सिंधुदुर्ग मतदारसंघातून राणे यांचे चिरंजीव नीलेश विजयी झाल्यामुळे राज्यातील सत्ताधारी काँग्रेस आघाडीने कोकणातील शिवसेनेच्या परंपरागत वर्चस्वाला चांगलाच शह दिल्याचे वातावरण निर्माण झाले. रत्नागिरी जिल्ह्य़ातही राष्ट्रवादी काँग्रेसचे माजी प्रदेशाध्यक्ष व कामगारमंत्री भास्कर जाधव आणि जिल्ह्य़ाचे पालकमंत्री उदय सामंत यांच्यामुळे अनुक्रमे चिपळूण आणि रत्नागिरी तालुक्यात काँग्रेस आघाडीचे वर्चस्व निर्माण झाले. पण आता विधानसभा निवडणुकांच्या तोंडावर या दोन्ही पक्षांमध्ये गटबाजी उफाळून आली आहे. त्याचा फटका या निवडणुकीत संबंधित उमेदवारांना बसण्याची शक्यता आहे.