पालकमंत्रिपदांचं वाटप होताच महायुतीत वाद? शिंदेंचे मंत्री नाराज, भुसे-गोगावलेंसाठी गुलाबराव पाटील मैदानात; नेमकं काय म्हणाले?

गुलाबराव पाटील म्हणाले, “मला तिसऱ्यांदा जळगाव जिल्ह्याचं नेतृत्व करण्याची संधी व मान मिळाला आहे. उपमुख्यमंत्री एकनाथ शिंदे यांच्या आशीर्वादाने मला हे पद मिळालं आहे. त्यांनी माझ्यावर विश्वास ठेवला आहे. मागील पाच वर्षे या जिल्ह्यात तीन मंत्री होते. परंतु, पालकमंत्रिपद माझ्याकडे होते. या काळात माझ्या हातून काही छोट्या मोठ्या चुका झाल्या असतील. परंतु, विकासकामे बघून मला ही संधी दिली आहे. आम्ही तिन्ही मंत्री मिळून जिल्ह्याचा विकास करणार आहोत. आमच्यामध्ये कोणतीही रस्सीखेच नव्हती. मात्र, मंत्री दादा भुसे व भरत गोगावले यांना नक्कीच पालकमंत्रिपद मिळायला हवं होतं. तशी आमची इच्छा होती. त्यांच्यावर निश्चितच अन्याय झाला आहे”.

गिरीश महाजन व आदिती तटकरेंमुळे दादा भुसे व भरत गोगावलेंचा पत्ता कट

शालेय शिक्षणमंत्री दादा भुसे आणि फलोत्पादन तथा रोजगार हमी मंत्री भरत गोगावले यांना मंत्रिपद मिळालेलं नाही. दादा भुसे हे नाशिकचं पालकमंत्रिपद मिळावं यासाठी प्रयत्न करत होते. मात्र जळगाव जिल्ह्यातील मंत्री गिरीश महाजन यांना नाशिकचं पालकमंत्रिपद देण्यात आलं आहे. तर, भरत गोगावले यांना रायगड जिल्ह्याचं पालकमंत्रिपद हवं होतं. फडणवीस सरकारमध्ये रायगडची जबाबदारी महिला व बाल कल्याण मंत्री तथा राष्ट्रवादी काँग्रेस पार्टीच्या नेत्या आदिती तटकरे यांच्याकडे सोपवण्यात आली आहे.

रायगडमधील रस्सीखेच तटकरेंनी जिंकली

रायगड जिल्ह्याच्या पालकमंत्रिपदावरून राष्ट्रवादी (अजित पवार) आणि शिवसेनेत (शिंदे) मोठी रस्सीखेच चालू होती. भरत गोगावले रायगड जिल्ह्याचं पालकमंत्रिपद मिळावं, यासाठी आग्रही होते. याबाबत त्यांनी अनेकदा अपेक्षाही बोलून दाखवल्या होत्या. मात्र, रायगडच्या पालकमंत्रिपदाची जबाबदारी आदिती तटकरे यांच्याकडे देण्यात आल्यामुळे गोगावलेंच्या नाराजीची चर्चा ऐकायला मिळत नाही.