पंढरपूर बाजार समितीमध्ये बेदाण्यास उच्चांकी दर, किलोला सरासरी २०० ते ५११ रुपये दर !

येथील कृषी उत्पन्न बाजार समितीमध्ये नुकतेच बेदाणा सौदे बाजार झाला. या वेळी बाजारात १ हजार ७५० टन बेदाण्याची आवक झाली होती. सौदे बाजारात त्यापैक १ हजार ५०० टन बेदाण्याची विक्री झाली. या बाजारात बेदाण्याला ५० रुपये ते ५११ रुपये व सरासरी २०० रुपये प्रति किलो दर निघाला. येथील पार्श्वनाथ ट्रेडर्स प्रो. स्वप्नील कोठाडिया यांचे आडत दुकानात तालुक्यातील बार्डी येथील आकाश धनाजी वसेकर यांच्या ३३ बॉक्स बेदाण्यास ५११ रुपये प्रती किलो उच्चांकी दर मिळाला. वसेकर यांचा बेदाणा माल सांगली जिल्ह्यातील तासगाव येथील मे. राजेश्वरी ट्रेडींग कंपनी यांनी उच्चांकी दराने खरेदी केला. तसेच मे. श्री. सोमनाथसदाशिव डोंबे यांचे आडत दुकानात सोमनाथ महादेव गोरे रा. कोन्हेरी ता. मोहोळ यांच्या १० बॉक्स बेदाण्यास ५०० रुपये प्रती किलो दर मिळाला. हा माल रोहिणी ट्रेडिंग कंपनी सांगली यांनी खरेदी केला. तुलसी ट्रेडिंग कंपनी यांचे आडत दुकानी लक्ष्मण दासु व्यवहारे (रा. करकंब) यांच्या १९ बॉक्स बेदाण्यास ४२१ रुपये प्रती किलो दर मिळाला. सदर माल एस. मनिलाल कंपनी, तासगांव यांनी खरेदी केल्याची माहिती गायकवाड व उपसभापती राजू गावडे यांनी दिली.

या वेळी शेतकरी आकाश धनाजी वसेकर रा. बार्डी व आडते स्वप्नील कोठाडिया, यांचे बाजार समितीचे सभापती हरिषदादा भास्करराव गायकवाड यांनी व युटोपियन शुगर्सचे अध्यक्ष उमेशराव परिचारक यांनी समक्ष बेदाणा मालाची पहाणी करून शेतकरी व आडते, व्यापारी यांचे कौतुक केले. पंढरपूर कृषि उत्पन्न बाजार समितीमध्ये शेतकऱ्यांच्या सोयीसाठी बेदाण्याचे मालाला उठाव व मागणी चांगली आहे. व्यापारी मोठ्या प्रमाणावर माल खरेदीसाठी येत आहेत. आवक चांगली असून, दर चांगला मिळत असल्याने शेतकरी माल विक्रीसाठी पंढरपूर बाजार समितीस प्राधान्य देत आहेत. यावेळी बेदाणा असोसिएशनचे अध्यक्ष व संचालक सोमनाथ डोंबे, यासीन बागवान, महादेव लवटे, महादेव बागल व अन्य संचालक आडते, व्यापारी, तसेच बाजार समितीचे अधिकारी, कर्मचारी आदी उपस्थित होते.