वेगवान वाहनधारकांसाठी सुस्थितीतील महामार्गाची गरज भासतेच यामध्ये शंका घेण्याचे कारण नाही. मात्र, वेगवान वाहनांच्या धडकेत एखादा मनुष्यप्राणी प्राणाला मुकला आणि त्याला मदत न मिळता त्याच्या देहावरून शेकडो वाहनांचा प्रवास तसाच होत असेल तर माणुसकीलाही शरम वाटावी अशा वेगाचा काय उपयोग असा प्रश्‍न मनात येतो. अशीच एक ह्दयद्रावक घटना नव्याने होत असलेल्या रत्नागिरी-नागपूर महामार्गावर रविवारी मध्यरात्री घडली आहे. महामार्गावर अज्ञात वाहनाच्या धडकेने मृत्यूमुखी पडलेल्या व्यक्तीच्या अंगावर शेकडो वाहने गेल्याची धक्कादायक घटना समोर आली आहे. वेगवान वाहनांनी चिरडल्यामुळे पार्थिवाचे तुकडे पोत्यात भरण्याची वेळ पोलिसांवर आली होती.
याबाबत माहिती अशी की, एक अज्ञात व्यक्ती रत्नागिरी- कोल्हापूर महामार्गावरील मिरजेजवळील निलजी-बामणी गावच्या हद्दीमध्ये काल रात्री अज्ञात वाहनाच्या धडकेने रस्त्यावर पडली. वाहनाची धडक बसलेली व्यक्ती तशीच रस्त्यावर पडून राहिली असताना त्या व्यक्तीच्या देहावरून शेकडो वेगवान वाहने तशीच पुढे गेली. यामुळे या पार्थिवाचे तुकडे रस्त्यावर विखुरले गेले. ही माहिती मिळताच मिरज ग्रामीण पोलीसांनी घटनास्थळी धाव घेउन या पार्थिवाचे महामार्गावर विखुरलेले तुकडे गोळा करीत पोत्यात भरले आणि पंचनाम्याचा सोपस्कार पार पाडला.
अद्याप या व्यक्तीची ओळखही पटू शकली नाही. यामुळे अज्ञात व्यक्तीचा अज्ञात वाहनाने धडक दिल्याने अपघाती मृत्यू एवढी नोंद सरकारी कागदपत्रावर झाली. मृत व्यक्ती बेघर असल्याची प्राथमिक माहिती पोलीसांना मिळाली असली तरी ओळख मात्र अद्याप पटविण्यात अद्याप पोलिसांना यश आलेले नाही.
