अवैध दारू तस्करीसाठी तरुणांचा कहर; सॅनिटरी पॅडच्या आडून सुरू होतं काळं कृत्य

गोव्यातून धुळेमार्गे गुजरातला मोठा मद्यसाठा नेला जात असल्याची खात्रीशीर माहिती धुळे स्थानिक गुन्हे शाखेचे पोलीस निरीक्षक हेमंत पाटील यांना मिळाली होती. ही गोपनीय माहिती मिळताच मुंबई-आग्रा महामार्गावरील आवधान शिवारात स्थानिक गुन्हे शाखेच्या पथकाने सापळा रचत संशयित आयशर ट्रक थांबवला. चालकाकडे गाडीतील मालाबबत विचारपूस केली. यावेळी ट्रकमध्ये सॅनिटरी पॅडने भरलेल्या गोण्या असल्याचे चालक व वाहकाकडून सांगण्यात आले.

पण पोलिसांना त्यांच्यावर संशय आल्यावर त्यांनी आयशर ट्रकमधील मालाची तपासणी केली. या तपासात पोलिसांना सॅनिटरी पॅडच्या गोण्यांखाली चक्क मोठ्या प्रमाणात बियर व विदेशी दारूचा साठा आढळून आला. पोलिसांनी आयशर ट्रकमधून ७ लाख ८१ हजार ८०० रुपये किमतीचे विदेशी दारूचे तब्बल २०५ खोके, ५२ हजार ८०० रुपये किमतीचे बीयरचे २० खोके, १२ हजार रुपये किमतीच्या सॅनिटरी पॅडच्या १०० गोण्या व १० लाख रुपये किमतीचा आयशर ट्रक, असा एकूण १८ लाख ४४ हजार ६०० रुपये किमतीचा मुद्देमाल हस्तगत केला.