बीड : दहावीची परिक्षा अकराव्या प्रयत्नात उत्तीर्ण; ग्रामस्थांकडून दणदणीत मिरवणूक

कृष्णा मुंडे याने अकराव्या प्रयत्नात दहावीची परीक्षा उत्तीर्ण हाेण्यात यश मिळवले. दहा वेळा परीक्षा देऊनही हाती अपयश आलेले कृष्णा हे एक अजब उदाहरण म्हणून ग्रामस्थांमध्ये चर्चा चालायची. कृष्णाचा गावमित्र मंगेश मुंडे यांनी सांगितले की, आपल्या मुलाने किमान दहावी तरी उत्तीर्ण व्हावे, ही त्याच्या मजुरी करणारे, जेमतेम काही गुंठ्ठे खडकाळ जमीन असलेल्या वडिलांची तीव्र इच्छा. मात्र, कृष्णाला अभ्यासात फार गती नव्हती. त्याचे सुरुवातीला इतिहास, नंतर हिंदी, मराठी, असे प्रत्येक वर्षी याप्रमाणे विषय निघत गेले. मार्चमध्ये त्याने एकच विषय राहिलेल्या गणिताची परीक्षा दिली हाेती. ताेही आता निघाला. कृष्णाला ४९ टक्के गुण मिळाले आहेत. त्याची घरची परिस्थिती अगदीच जेमतेम असल्याने ग्रामस्थांकडूनही आर्थिक मदत घेत त्याला दहावीत उत्तीर्ण हाेण्यासाठी हातभार लावण्यात आला.