“बळकट समाजासाठी शारीरिक, मानसिक आरोग्य महत्त्वाचे”, अशोक काकडे यांचे आवाहन

जिल्हाधिकारी श्री. काकडे म्हणाले, बऱ्याचदा महिला, गोरगरीब नागरिक हे आजार खूप दिवस अंगावर काढतात, त्यामुळे ते आजार पुढील काळात गंभीर स्वरूप प्राप्त करतात. त्यामुळे आपल्या भागामध्ये आयोजित करण्यात येत असलेल्या आरोग्य शिबिरामध्ये विविध आजारांचे निदान करण्यात येत आहे व त्यामध्ये उपचार किंवा शस्त्रक्रियेची गरज भासल्यास संदर्भ सेवा पुरविली जाणार आहे. याचा गरजू नागरिकांनी लाभ घ्यावा, असे आवाहन त्यांनी या वेळी केले.

महानगरपालिका आयुक्त शुभम गुप्ता यांनी या अभियानांतर्गत सेवा पुरवण्यात येणाऱ्या अतिजोखमीचा असणारा समुदाय यांचे समुपदेशन, संशयित क्षयरोग रुग्ण तपासणी, एच. आय. व्ही. आणि गुप्तरोग तपासणी व उपचार, कावीळ, मधुमेह, उच्च रक्तदाब आणि ॲनिमिया निदान व उपचार तसेच इतर अत्यावश्यक गरजेनुरूप तपासणीबाबत लाभ घेण्याचे नागरिकांना आवाहन केले. वैद्यकीय अधिकारी व कर्मचारी यांनी सदर सेवा सर्व शिबिरार्थींना देण्याबाबत सतर्क राहावे, अशा सूचना दिल्या.