सांगली : विधानसभा निवडणुकीसाठी मला राज्यभर फिरावे लागणार आहे. यामुळे विरोधकांकडून लक्ष्य केले जाऊ शकते. कार्यकर्त्यांनी चिंता करण्याची गरज नसली तरी गाफीलही राहू नये, असे आवाहन राष्ट्रवादी काँग्रेस शरदचंद्र पवार पक्षाचे प्रदेशाध्यक्ष आमदार जयंत पाटील यांनी केले.
इस्लामपूर येथे वाळवा तालुका राष्ट्रीय साखर कामगार संघाच्या वतीने राजारामबापू पाटील शिक्षण व उद्योग समूहातील कर्मचाऱ्यांच्या स्नेहमेळाव्यात ते बोलत होते. सांगली जिल्हा मध्यवर्ती बँकेचे अध्यक्ष आ. मानसिंगराव नाईक, राजारामबापू साखर कारखान्याचे अध्यक्ष प्रतीकदादा पाटील, राज्य साखर संघाचे अध्यक्ष पी.आर. पाटील, राजारामबापू बँकेचे अध्यक्ष प्रा.शामराव पाटील, राजारामबापू सहकारी दूध संघाचे अध्यक्ष नेताजीराव पाटील, कासेगाव शिक्षण संस्थेचे सचिव आर.डी. सावंत, महाराष्ट्र राज्य साखर कामगार प्रतिनिधी मंडळाचे सरचिटणीस शंकरराव भोसले, साखर कामगार संघाचे अध्यक्ष राजेंद्र चव्हाण, कार्याध्यक्ष तानाजीराव खराडे प्रामुख्याने उपस्थित होते.
हेही वाचा : मुख्यमंत्री एकनाथ शिंदेंना बच्चू कडू यांचा इशारा; म्हणाले, “उचलून थेट…”
पाटील म्हणाले, की आपल्या राज्यातील वाढत्या राजकीय प्रभावातून शिक्षण संस्थेसह आपल्या संस्थांची प्रगती झाली आहे. बँक भक्कम स्थितीत आहे, मात्र साखर कारखाना व दूध संघास खासगी संस्थांच्या आव्हानांना सामोरे जावे लागेल. लोकसभा निवडणुकीनंतर राज्यात महाविकास आघाडीचे सरकार येण्यासारखे सकारात्मक वातावरण निर्माण झाले आहे. मला राज्यात फिरावे लागणार असल्याने आपण आपल्या भागाची जबाबदारी घेऊन कामाला लागावे. प्रारंभी कामगार नेते शंकराव भोसले यांनी स्वागत केले. साखर कामगार संघाचे कार्याध्यक्ष तानाजीराव खराडे यांनी आभार मानले. विश्वनाथ पाटसुते यांनी सूत्रसंचालन केले.
