सातारा : मालमत्ता हडपण्याचा प्रयत्न; माणमध्ये भोंदूबाबाला अटक

सातारा: २७ वर्षांपूर्वी हरवलेला मुलगा असल्याचे सांगत वृद्ध महिलेला फसवणाऱ्या व त्यांची मालमत्ता बळकवणाऱ्या भोंदूबाबाला दहिवडी पोलिसांनी अटक केली आहे. त्याच्यावर फसवणुकीचा गुन्हा दाखल केला आहे. एकनाथ रघुनाथ शिंदे, (ओझर बुद्रक, ता जामनेर,जळगाव) असे त्याचे नाव आहे. शिंदी बुद्रुक (ता. माण) येथे एखाद्या चित्रपटाला साजेल असा प्रकार समोर आला आहे. गावातील द्वारकाबाई विष्णू कुचेकर या महिलेचा २७ वर्षांपूर्वी १९९७ साली एकुलता एक आठवीत असणारा मुलगा हरवला. कुटुंबासह पोलिसांनी शोध घेतला. मात्र तो मिळाला नाही. दोन वर्षांपूर्वी एक साधू घरातील वृध्द महिलेसमोर आला आणि त्याने आई मला ओळखलेस का? असे म्हणत घट्ट मिठी मारून मीच तुझा मुलगा असे सांगितले. त्या महिलेसह त्या महिलेच्या विवाहित बहिणींनाही खरे वाटले. त्याने रेशनकार्ड, आधार कार्ड यासह घरातील सर्व मालमत्तेवर नाव नोंदवले.