“नेतृत्वाची खाण असतानाही सांगलीत विमानतळाची प्रतीक्षा हे दुर्दैव”, उद्योगमंत्री उदय सामंत यांचे मत

सामंत म्हणाले, की जिल्ह्यातून विमानतळाची आग्रही मागणी होत आहे. विकासासाठी त्याची गरज आहेच, मात्र, यासाठी आवश्यक बाबी आहेत का, याचीही पडताळणी करायला हवी. सिंधुदुर्ग जिल्ह्यासाठी विमानतळ उभारण्यात आले. मात्र, याठिकाणी आठवड्यातून दोन ते तीन वेळा विमान उतरते. याचाही विचार करायला हवा. सांगली जिल्हा हा नेतृत्वाची खाण आहे. या जिल्ह्याचे नेतृत्वगुण पाहत आम्ही मोठे झालो. तरीही अजून विमानतळाची मागणी करावी लागते हे जिल्ह्याचे दुर्दैव म्हणावे लागेल. या जिल्ह्याने मराठी भाषेला ‘करेक्ट कार्यक्रम’ हा शब्द दिला. मी आहे त्या पदावर समाधानी आहे असेही त्यांनी स्पष्ट केले. आजच्या पिढीच्या हाती असलेले मोबाइल हे फार मोठे शस्त्र तर आहेच, पण याचा वापर किती जबाबदारीने केला जातो यावर या पिढीचे भवितव्य अवलंबून आहे. कृत्रिम बुध्दिमत्तेचा वापरही उपयोजित झाला पाहिजे तरच त्याचा फायदा समाजाला होणार आहे. दिल्लीच्या जवाहरलाल नेहरू विद्यापीठात कवी कुसुमाग्रज यांच्या नावाने मराठी भाषा गौरव दिनापासून मराठी अध्यासन सुरू करण्यात आले असल्याचेही मंत्री सामंत म्हणाले.