अमानुष शिक्षेमुळे विद्यार्थी अत्यवस्थ

नालासोपारा येथील विलीजॉर्ड शाळेतील कराटे शिकवणाऱ्या शिक्षकाने सहा विद्यार्थ्यांना २०० बैठका काढण्याची अमानुष शिक्षा दिल्याचे प्रकरण समोर आले आहे. यामुळे एका विद्यार्थ्यांच्या पायाच्या स्नायूला दुखापत झाली असून त्याच्यावर खासगी रुग्णालयात उपचार सुरू आहेत. तुळिंज पोलिसांनी संबंधित प्रशिक्षकावर गुन्हा दाखल केला आहे.

नालासोपारा पूर्वेला विलीजॉर्ड नावाची खासगी शाळा आहे. या शाळेने ऑल इंडिया शोथोकॉन कराटे फेडरेशन या संस्थेशी करार केला असून संस्थेचे चार प्रशिक्षक दररोज शाळेतील मुलांना खेळ आणि इतर तंदुरूस्तीचे प्रकार शिकवण्यासाठी येत असतात. यातील मणी चौधरी हा कराटे प्रशिक्षक आहे. शुक्रवार, ८ फेब्रुवारी रोजी चौधरीने मस्ती करणाऱ्या सात विद्यार्थ्यांना शाळेच्या गच्चीवर नेऊन २०० बैठका काढण्याची शिक्षा दिली. ही सर्व मुले सहावीत शिकणारी होती. बैठका काढल्यामुळे मुलांना त्रास होऊ  लागला. कशीबसे त्यांनी ही शिक्षा पूर्ण केली. मात्र घरी गेल्यावर त्यांना पायात त्रास जाणवू लागला. छेडानगर येथील भावेश प्लाझा इमारतीत राहणाऱ्या श्रीगणेश कांबळे (१२) या विद्यार्थ्यांच्या पायाच्या स्नायूत जबर दुखापत झाली. त्याला जागेवरून उठताही येत नव्हते. सोमवारी त्याने आपल्या पालकांना हा प्रकार सांगितला. त्यानंतर पालकांनी त्याला नालासोपारा येथील एका खासगी रुग्णालयात उपचारासाठी दाखल केले. पालकांनी याआप्रकरणी तुळींज पोलीस ठाण्यात तक्रार दिली.

या तक्रारीवरून तुळींज पोलिसांनी आरोपी प्रशिक्षकाविरोधात बालकांच्या क्रुरता विरोधी अधिनियम २०१५ च्या कलम ७५ अन्वये गुन्हा दाखल केला आहे. आम्ही घटनेचा पंचनामा केला असून सीसीटीव्ही तपासणार आहोत, असे तुळींज पोलीस ठाण्याचे वरिष्ठ पोलीस निरीक्षक डॅनियल बेन यांनी सांगितले.

शाळेचे विश्वस्त बिलीजॉर्ड जॉर्ज यांनी रुग्णालयात भेट देऊन पालकांना दहा हजारांची आर्थिक मदत केली. या प्रकरणातील प्रशिक्षक शाळेचा कर्मचारी नव्हता, असे बिलिजॉर्ड यांनी सांगितले. तो ज्या संस्थेता होता, त्या संस्थेला आम्ही नोटिस दिली असून या प्रकरणाच्या चौकशीसाठी समिती स्थापन केल्याचे त्यांनी सांगितले. त्या प्रशिक्षकाला शाळेत यापुढे बंदीही घालण्यात आली आहे. पोलीस तपासात सर्व ते सहकार्य करणार असल्याचेही ते म्हणाले.