शिवसेना (ठाकरे गट) खासदार संजय राऊत यांनी भाजपा नेते मोहित कंबोज यांच्याबाबत मोठा दावा केला होता. मोहित कंबोज हे शनिवारी रात्री साडेतीन वाजता बारमध्ये मुलींना घेऊन नाचत होते, असा दावा राऊत यांनी केला. याप्रकरणी गृहमंत्री आणि पोलिसांनी तत्काळ कारवाई करावी, अशी मागणीही त्यांनी केली. याबाबतचा एक व्हिडीओही संजय राऊत यांनी आपल्या ट्विटर खात्यावरून शेअर केला होता.
संजय राऊत यांच्या दाव्यानंतर मोहित कंबोज यांची पत्नी अक्षा कंबोज यांनी मोठा खुलासा केला आहे. शनिवारी रात्री बारमध्ये मोहित कंबोज यांच्याबरोबर केवळ मीच होते. त्यामुळे यावर कोण काय म्हणत आहे, याने काहीही फरक पडत नाही, असं ट्वीट अक्षा कंबोज यांनी केलं आहे.
अक्षा कंबोज यांनी ट्वीटमध्ये म्हटलं की, “शनिवारी रात्री मित्राच्या वाढदिवसाच्या पार्टीसाठी आम्ही रेडिओ बारमध्ये गेलो होतो. या बारमध्ये मोहित कंबोज यांच्याबरोबर मी एकमेव मुलगी होते. त्यामुळे यावर कोण काय म्हणत आहे, याने काहीही फरक पडत नाही. बनावट कथा फार काळ टिकणार नाहीत.”
नेमकं प्रकरण काय आहे?
संजय राऊत यांनी संभाजी ब्रिगेड संघटनाप्रमुख सचिन कांबळे यांचा एक व्हिडीओ ट्वीट केला होता. “लिंक रोड खार पश्चिम येथील रेडिओ बारमध्ये देवेंद्र फडणवीस यांचे खास मोहित कंबोज मुलींना घेऊन नाचत आहेत, धिंगाणा घालत आहेत. रात्री साडेतीन वाजता हा व्हिडीओ शूट केला आहे. येथे कायदा-सुव्यवस्था आहे की नाही? मोहित कंबोज बेधुंद अवस्थेत, नशा करून मुलींबरोबर नाचत आहेत,” असा दावा सचिन कांबळे यांनी व्हिडीओद्वारे केला होता.
सचिन कांबळे यांचा हाच व्हिडीओ संजय राऊत यांनी ट्विटरद्वारे शेअर केला. राज्याचे गृहमंत्री देवेंद्र फडणवीस, केंद्रीय गृहमंत्री अमित शाह, मुंबई पोलीस आयुक्त आणि नार्कोटिक्स ब्युरोला टॅग करत त्यांनी, “महाशय आपण काय कारवाई केली ते जनतेला कळू द्या. येथे अंमली पदार्थांचे सेवन आणि विक्री होत असल्याची माहिती आहे. भाजपाचे हिंदुत्व येथे काय करीत होते? सीसीटीव्ही फुटेज लगेच ताब्यात घ्या. खोक्यांचे राज्य हे अंमली पदार्थांचे राज्य होऊ नये”, असं ट्वीट राऊतांनी केलं होतं.
