Jalna Lathi Charge: जालन्यात ऊर बडव्यांचे मगराश्रू; मुख्यमंत्री एकनाथ शिंदे यांची ठाकरे, चव्हाणांवर टीका

‘शासन आपल्या दारी’ हा कार्यक्रम आज मलकापूर मार्गावरील कऱ्हाडे लेआऊटमध्ये पार पडला. या कार्यक्रमाला दोन्ही उपमुख्यमंत्री वगळता मंत्री, खासदार, आमदार बहुसंख्येने हजर होते. ‘‘राज्य सरकार मराठा आरक्षणासाठी कटिबद्ध आहे. ४० वर्षे सत्तेत असणाऱ्यांनी त्यांच्या कार्यकाळात मराठा आरक्षणावर एक शब्दही काढला नाही. आज ऊर बडवणाऱ्यांनी अडीच वर्षांच्या मुख्यमंत्रीपदाच्या काळात आरक्षणविषयक प्रशासकीय व अनुषंगिक घोळ घातला. त्यामुळे तत्कालीन मुख्यमंत्री फडणवीस यांच्या काळात उच्च न्यायालयापर्यंत टिकलेले आरक्षण रद्द झाले. सर्वोच्च न्यायालयात यासाठी अभ्यासू सॉलिसिटर, विधिज्ञ नेमण्यात आले नाही,’’ असा आरोप मुख्यमंत्र्यांनी यावेळी केला.

हेही वाचा >>> Jalna Lathi Charge : न्यायालयीन चौकशीचे मुख्यमंत्र्यांचे संकेत; पोलीस अधीक्षक सक्तीच्या रजेवर

एका सामान्य शेतकऱ्याचा मुलगा मुख्यमंत्री झाला म्हणून विरोधक माझा पराकोटीचा द्वेष, मत्सर करतात. मात्र, एक वर्ष उलटूनही माझे पद कायम आहे. याउलट आता अजित पवार सत्तेत सहभागी झाल्याने पद अन सरकार अधिकच बळकट झाल्याचा टोला त्यांनी लगावला. मंत्री गिरीश महाजन यांनी, चाळीस वर्षांत मराठा आरक्षणावर एक शब्द न बोलणाऱ्या शरद पवार यांची जालना भेटीत ‘ऐतिहासिक नाचक्की’ झाल्याचे यावेळी वक्तव्य केले.

हेही वाचा >>> Jalna Lathi Charge: पंढरपुरात बंदला प्रतिसाद, भाविकांचे हाल; जालन्यातील लाठीमाराचे दुसऱ्या दिवशीही पडसाद

दोन्ही उपमुख्यमंत्री अनुपस्थित

मुख्यमंत्र्यांच्या रविवारच्या सभेला उपमुख्यमंत्री देवेंद्र फडणवीस व उपमुख्यमंत्री अजित पवार दोघेही उपस्थित नव्हते. यामुळे अनेकांच्या मनात शंकेची पाल चुकचुकली. मुख्यमंत्र्यांनी भाषणादरम्यान दोन्ही उपमुख्यमंत्री हजर नसल्याचे कृपया राजकारण करू नका, असे विरोधक व प्रसारमाध्यमांना उद्देशून म्हटले.

संतप्त शेतकऱ्याचा आक्रोश

मुख्यमंत्र्यांनी भाषणात शेतकरी व दुष्काळग्रस्त परिस्थिती यावर काहीच भाष्य केले नाही. यामुळे एका शेतकऱ्याने जागेवरून उठून ‘दुष्काळाबद्दल सांगा’ असे ओरडून सांगितले. तेथे तैनात पोलिसांनी तत्काळ त्याच्याभोवती कडे घालत सभास्थळाबाहेर नेले.