भाजपा-शिंदे गटाच्या वादावर जयंत पाटलांचं भाष्य; म्हणाले, “भाजपाने एकनाथ शिंदेंसमोर गुडघे…”

भारतीय जनता पार्टीने सत्ता टिकवण्यासाठी एकनाथ शिंदे यांच्यासमोर गुडघे टेकवले आहेत. आगामी लोकसभा निवडणुकीत शिंदे गटाचे सर्व नेते भारतीय जनता पार्टीच्या चिन्हावर निवडणूक लढण्याचा आग्रह करतील, अशी मोठी भविष्यवाणी जयंत पाटील यांनी केली आहे. लोकसभा निवडणुकीला अजून एक वर्ष बाकी आहे. येत्या काळात आपल्याला हळूहळू सगळं समजेल, असंही जयंत पाटील म्हणाले. ते प्रसारमाध्यमांशी संवाद साधत होते.

हेही वाचा- “वादावर पडदा पडण्याचा प्रश्नच नाही, आम्ही…”; खासदार श्रीकांत शिंदेंचं जाहिरात वादावर वक्तव्य, म्हणाले…

शिंदे गट-भाजपातील अंतर्गत कलहावर भाष्य करताना जयंत पाटील म्हणाले की, “हे आगतिकतेनं एकत्रित आलेले लोक आहेत. भाजपाने सत्ता टिकवण्यासाठी शरणागती पत्करुन असून त्यांनी एकनाथ शिंदे यांच्यासमोर गुडघे टेकले आहेत. तसेच एकनाथ शिंदेंसाठी एकप्रकारे अदृश्य परिस्थिती निर्माण झाली आहे. त्यामुळे त्यांनाही नाइलाजाने यात राहावं लागत आहे. त्यामुळे भाजपा-शिंदे गटात असे थोडेफार वाद होतील. कदाचित शिंदे गटाच्या चिन्हावर निवडणूक लढायला कुणीच उभं राहणार नाही. सगळेच कमळाच्या चिन्हावर उभं राहण्याचा आग्रह करतील. लोकसभा निवडणुकीला अजून एक वर्ष बाकी आहे. आपल्याला हळूहळू सर्व कळेल.”