महाविकास आघाडी स्थापन करण्यासाठी संजय राऊत कुठे कुठे धावपळ करत होते, कोणाकडे हेलपाटे मारत होते, अशा शब्दात भाजपा आमदार नितेश राणे यांनी शिवसेनेच्या ठाकरे गटाचे खासदार संजय राऊत यांच्यावर टीका केली आहे. या टीकेला आता महाविकास आघाडीतला ठाकरे गटाचा मित्र पक्ष असलेल्या राष्ट्रवादी काँग्रेसने उत्तर दिलं आहे. राष्ट्रवादी काँग्रेसचे आमदार जितेंद्र आव्हाड यांनी राणेंना प्रत्युत्तर दिलं आहे.
आमदार जितेंद्र आव्हाड म्हणाले, कोण कोणाकडे जाण्यासाठी धावपळ करत होतं हे संजय राऊतांना बोलू नका. काही वर्षांपूर्वी कोण कोणाकडे जाण्यासाठी आटापिटा करत होतं, हे आम्हाला व्यवस्थित माहिती आहे. परंतु आम्ही त्यावर काही बोलत नाही. आम्ही यावर बोलत नाही हा त्यांनी आमचा मोठेपणा समजावा. बंद मुट्ठी लाख की खुल गई तो खाक की, हे त्यांनी ध्यानात ठेवावं.
हे ही वाचा >> “१२ वर्ष काँग्रेसने आम्हाला कधीच…”, नितेश राणेंनी वडिलांसमोर व्यक्त केली खंत
नितेश राणे यांनी नुकताच संजय राऊत यांच्याबद्दल मोठा दावा केला आहे. संजय राऊत हे १० जूनपर्यंत राष्ट्रवादीत प्रवेश करतील, असा दावा राणे यांनी केला आहे. या दाव्यावरही आव्हाड यांनी प्रतिक्रिया दिली आहे. आव्हाड म्हणाले, काही काम नसल्यावर हे लोक हात ज्योतिष बघायला सुरुवात करतात. त्यांना गांभीर्याने घेतलं जात नाही. मी माझी संपूर्ण राजकीय कारकिर्दीत अशा लोकांना कधीही गांभीर्याने घेतलं नाही. या लोकांना असं सोडून द्यावं. जोक्स मारू द्यावेत, आपण त्यावर फक्त हसायचं.
