भाजपाचे आमदार नितेश राणे हे कणकवली विधानसभा मतदारसंघाचे विद्यमान आमदार आहेत. कणकवली विधानसभा मतदारसंघ हा रत्नागिरी-सिंधुदुर्ग लोकसभा मतदारसंघाचा एक भाग आहे. सिंधुदुर्ग जिल्ह्यातील देवगड, वैभववाडी आणि कणकवली या तालुक्यांचा कणकवली विधानसभा मतदारसंघात समावेश होतो. आमदार नितेश राणे हे महाराष्ट्राचे माजी मुख्यमंत्री व माजी केंद्रीय मंत्री तसेच भाजपाचे ज्येष्ठ नेते नारायण राणे यांचे चिरंजीव आहेत. नितेश राणे हे २०१९ मध्ये सलग दुसऱ्यांदा कणकवली मतदारसंघातून विधानसभेवर निवडून गेले.
काँग्रेसमधून भाजपमध्ये प्रवेश केल्यानंतर नितेश राणे यांनी हिंदुत्वाची कास पकडली आहे. वादग्रस्त विधानांमुळे नितेश राणे हे नेहमी चर्चेत असतात. त्यांचे वडिल भाजपाचे ज्येष्ठ नेते नारायण राणे हे रत्नागिरी-सिंधुदुर्ग लोकसभा मतदारसंघाचे विद्यमान खासदार आहेत. २०२४ मध्ये झालेल्या लोकसभा निवडणुकीत नारायण राणे यांनी उद्धव ठाकरेंच्या शिवसेनेचे उमेदवार विनायक राऊत यांचा पराभव केला. रत्नागिरी व सिंधुदुर्ग या जिल्ह्यांतील राजकारणावर राणे कुटुंबाची पकड आहे.
हेही वाचा : Beed Assembly constituency: बीड विधानसभा मतदारसंघ: काका-पुतण्याच्या संघर्षानंतर आता भावा-भावात सामना होणार?
२०१४ व २०१९ मध्ये कणकवली विधानसभा निवडणुकीतील स्थिती
२०१४ मध्ये नितेश राणे यांनी काँग्रेसकडून विधानसभा निवडणूक लढवली होती. कणकवली मतदारसंघातून ते विधानसभेवर निवडून गेले होते. २०१४ ची विधानसभा निवडणूक भाजपा व शिवसेना यांनी स्वतंत्रपणे लढवली होती. त्यावेळी काँग्रेसच्या नितेश राणे यांनी भाजपाचे उमेदवार प्रमोद जठार यांचा पराभव केला. नितेश राणे यांना ७४७१५ मते मिळाली, तर भाजपाच्या प्रमोद जठार यांना ४८७३६ व शिवसेनेच्या सुभाष मयेकर यांना १२८६३ मते मिळाली. राणे यांनी भाजपाच्या जठार यांचा २५ हजारांहून अधिक मताधिक्याने पराभव केला होता. २०१४ मधील विधानसभा निवडणुकीपूर्वी तत्कालिन काँग्रेसचे नेते नितेश राणे यांनी नरेंद्र मोदी यांच्या गुजरात मॉडेलवर तसेच भाजपावर टीका केली होती. तसेच मुंबईतील गुजराती नागरिकांनादेखील नितेश राणे यांनी टीकेचे लक्ष्य बनवले होते.
२०१९ च्या विधानसभा निवडणुकीपूर्वी नारायण राणे यांनी भाजपामध्ये प्रवेश केला. नारायण राणे यांचा महाराष्ट्र स्वाभिमान पक्ष देखील त्यावेळी भाजपमध्ये विलीन करण्यात आला. त्यानंतर त्यांचे पूत्र नितेश राणे व निलेश राणे यांनीदेखील कणकवली येथे पार पडलेल्या कार्यक्रमात भाजपमध्ये अधिकृत प्रवेश केला. नितेश राणे यांच्या भाजपा पक्ष प्रवेशास शिवसेनेकडून कडाडून विरोध झाला. २०१९ च्या विधानसभा निवडणुकीत महाराष्ट्रात भाजपा-शिवसेनेची युती होती. युती असूनही शिवसेनेने कणकवली विधानसभा मतदारसंघात भाजपा उमेदवार नितेश राणे यांच्या विरोधात उमेदवार दिला. शिवसेनेकडून सतीश सावंत यांना उमेदवारी देण्यात आली होती.
भाजपाच्या नितेश राणे यांना ८४५०४ मते मिळाली, तर शिवसेनेच्या सतीश सावंत यांना ५६३८८ मते मिळाली. राणे यांनी सावंत यांचा तब्बल २८११६ मतांनी पराभव केला. शिवसेना – भाजपाच्या महायुतीत वादग्रस्त ठरलेल्या जागेपैकी एक म्हणजे कणकवली मतदारसंघ होता. त्यामुळे ही निवडणूक शिवसेना विरुद्ध भाजपा अशी रंगली होती.
कोणाला मिळणार उमेदवारी?
रत्नागिरी-सिंधुदुर्ग लोकसभा निवडणूक २०२४ मध्ये भाजपाचे उमेदवार नारायण राणे यांना कणकवली विधानसभा मतदारसंघातून सुमारे ९२ हजार, तर प्रतिस्पर्धी ठाकरे गटाचे उमेदवार विनायक राऊत यांना ५० हजार मते मिळाली. नितेश राणे यांच्या कणकवली विधानसभा मतदारसंघातून भाजपाला तब्बल ४२ हजार मतांची आघाडी मिळाली. त्यामुळे नितेश राणे भाजपाचे संभाव्य उमेदवार असू शकतात. महाविकास आघाडीकडून भाजपाच्या नितेश राणे यांना आव्हान देण्यासाठी कोणाला उमेदवारी मिळणार, याबाबत अद्याप स्पष्टता नाही. काँग्रेसला ही जागा मिळण्याची शक्यता व्यक्त केली जात आहे.
