कुडाळ विधानसभा मतदारसंघात शिवसेनेचे उमेदवार निलेश राणे यांनी ठाकरे गटाचे आमदार वैभव नाईक यांचा पराभव केला आहे. वैभव नाईक हे २०१४ आणि २०१९ च्या विधानसभा निवडणुकीत कुडाळ मतदारसंघातून सलग दुसऱ्यांदा विधानसभेवर निवडून गेले होते. कुडाळ विधानसभा मतदारसंघ हा रत्नागिरी-सिंधुदुर्ग लोकसभा मतदारसंघाचा एक भाग आहे. कुडाळ विधानसभा मतदारसंघात सिंधुदुर्ग जिल्ह्यातील मालवण आणि कुडाळ या दोन तालुक्यांचा समावेश होतो.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

नारायण राणेंचा पराभव

कुडाळ विधानसभा मतदारसंघाचे आमदार वैभव नाईक हे त्यांच्या आक्रमक भाषण शैली व कार्यपद्धतीसाठी ओळखले जातात. शिवसेनेच्या वैभव नाईक यांनी २००९ मध्ये कुडाळ विधानसभा मतदारसंघातून निवडणूक लढवली होती. त्यावेळी काँग्रेस पक्षात असलेल्या नारायण राणे यांनी वैभव नाईक यांचा पराभव केला होता. या पराभवाचा वचपा वैभव नाईक यांनी २०१४ च्या विधानसभा निवडणुकीत काढला. २०१४ मध्ये झालेल्या विधानसभा निवडणुकीत शिवसेनेचे उमेदवार वैभव नाईक यांनी माजी मुख्यमंत्री व काँग्रेसचे उमेदवार नारायण राणे यांचा पराभव केला. नारायण राणे यांना पराभूत करणारे वैभव नाईक त्यावेळी जायंट किलर ठरले होते. या निवडणुकीत नाईक यांना ७०५८२ मते, तर राणे यांना ६०२०६ मते मिळाली होती.

आणखी वाचा

हेही वाचा : Mumbra Kalwa Vidhan Sabha Constituency : राष्ट्रावादीच्या बालेकिल्ल्यात कडवी झुंज, जितेंद्र आव्हाड विजयी चौकार लगावणार?

त्यानंतर २०१९ मध्ये झालेल्या विधानसभा निवडणुकीत कुडाळ विधानसभा मतदारसंघातून वैभव नाईक हे सलग दुसऱ्यांदा विधानसभेत निवडून गेले. यावेळी त्यांनी नारायण राणे यांचे समर्थक असलेले अपक्ष उमेदवार रणजीत देसाई यांचा पराभव केला. या निवडणुकीत नाईक यांना ६९१६८ मते मिळाली तर देसाई यांना ५४८१९ मते मिळाली.

निलेश राणेंचा विजय

भाजपाचे खासदार नारायण राणे यांचे पूत्र निलेश राणे यांना ऐन निवडणुकीच्या तोंडावर कुडाळ विधानसभा मतदारसंघातून शिंदे गटाकडून उमेदवारी मिळाली होती. कुडाळ विधानसभा मतदारसंघातून नारायण राणे यांना २०२४ च्या लोकसभा निवडणुकीत तब्बल २६ हजार २३६ इतके मताधिक्य मिळाले. त्यामुळे विधानसभा निवडणुकीत वैभव नाईक यांच्यासमोर महायुतीचे आव्हान होते. अखेर अटीतटीच्या लढतीत निलेश राणे यांच्याकडून वैभव नाईकांना पराभव पत्करावा लागला. निलेश राणे यांना ८१६५९ मते मिळाली, तर वैभव नाईक यांना ७३४८३ मतं मिळाली. ८ हजारांहून अधिक मताधिक्याने निलेश राणे यांनी विजय मिळवला आहे.

हेही वाचा : Teosa Vidhan Sabha Constituency : यशोमती ठाकूर यांच्यासमोर आव्हान कोणाचे ?

महायुतीत कुडाळ विधानसभा मतदारसंघ शिवसेना शिंदे गटाला मिळणार होता. त्यामुळे हा मतदारसंघ मिळवण्यासाठी भाजपने प्रयत्न सुरू केले होते. निलेश राणे हे धनुष्यबाण की कमळ यापैकी कोणत्या चिन्हावर लढणार याबाबत स्पष्टता नव्हती. परंतु, निलेश राणे यांनी शिवसेनेत (शिंदे) प्रवेश करत उमेदवारी देखील मिळवली होती त्यांच्या उमेदवारीसाठी नारायण राणे यांनी मुख्यमंत्री एकनाथ शिंदे यांची भेट घेतली होती.

मालवणमधील शिवपुतळा कोसळल्याचे राजकारण

कुडाळ विधानसभा मतदारसंघात मालवण तालुक्याचा समावेश होतो. मालवणमधील राजकोट किल्ल्यावर छत्रपती शिवाजी महाराजांचा पुतळा कोसळल्यानंतर आमदार वैभव नाईक यांनी आक्रमक भूमिका घेत महायुती सरकारला धारेवर धरले. पुतळा उभारताना मोठ्या प्रमाणात भ्रष्टाचार झाल्याचा आरोप नाईक यांनी केला होता.