कोजागिरी पौर्णिमेला लाखो भाविकांनी घेतले तुळजाभवानीचे दर्शन

परंपरेनुसार तुळजामातेचे माहेर असलेल्या सिंदफळ येथील मुदगुलेश्वर देवस्थान येथे सोलापूरच्या मानाच्या शिवलाड तेली समाजाच्या काठ्या आणि मानकर्‍यांचा बुधवारी रात्री मुक्काम झाला. गुरूवारी पहाटे मानकर्‍यांनी तुळजापूर घाटशीळ मार्गे कोजागिरी पौर्णिमा उत्सवासाठी प्रस्थान केले. सकाळी ९ वाजण्याच्या सुमारास घाळशीळ मार्गे प्रवेश केलेल्या मानाच्या काठ्यांचे समस्त तुळजापूरकरांनी सडा, रांगोळ्या रेखाटून भक्तिमय वातावरणात स्वागत केले. काठ्यांसोबत आलेल्या मानकरी व भक्तांचे भोपे पुजारी सचिन पाटील, संभाजीराव पाटील, प्रशांत पाटील, शिवराज पाटील यांनी स्वागत करून त्यांच्या निवासस्थानी विश्रामासाठी सोय करण्यात आली होती.

आणखी वाचा-IPS भाग्यश्री नवटाकेंचा पाय आणखी खोलात? १२०० कोटींच्या घोटाळ्याच्या चौकशीप्रकरणी सीबीआयकडून गुन्हा दाखल

कोजागिरी पौर्णिमेला कुलस्वामिनी तुळजाभवानी देवीच्या दर्शनासाठी पायी चालत येणार्‍या लाखो भाविकांचा जत्था सोलापूर ते तुळजापूर या मार्गावर दिसून येत होता. सकाळची नित्योपचार पूजा, आरती झाल्यानंतर दिवसभर लाखो अबालवृद्ध, स्त्री, पुरुष आदी भाविकांनी जगदंबेच्या दर्शनासाठी मोठी गर्दी केली होती. पौर्णिमेच्या रात्री जगदंबेच्या छबिन्यात सोलापूर येथून आलेल्या मानाच्या काठ्यांसह मानकरी, भाविक, गोंधळी, आराधी, वासुदेव यांनी मोठ्या प्रमाणात सहभाग नोंदविला होता. छत्री, अब्दागिरी, चवर्‍या दिवटे, पोतांसह निघालेल्या देवीच्या अश्विन पौर्णिमा उत्सवातील छबीना मिरवणूक अवर्णनीय ठरली. हजारो भाविकांनी आपल्या नवस व इच्छापूर्तीसाठी चांदीचा तोडा, पाटल्या, मुकुट देवीचरणी अर्पण करत मनोभावे दर्शन घेतले.

आणखी वाचा-Shyam Manav : “लाडकी बहीण योजना हलक्यात घेऊ नका, महायुतीतला हाकलायचं असल्यास…”, श्याम मानव यांचा मविआला सल्ला

पुण्यातील भाविकांकडून सजावट

कुलस्वामिनी तुळजाभवानी देवीच्या राजे शहाजी महाद्वारासमोर पुणे येथील भाविक आर. आर. किराड यांच्यावतीने हंस पक्षावर विराजमान तुळजाभवानी देवीचे रूप, तुळजाभवानी देवी मंदिराच्या गाभार्‍यात फुलांचे मयूर, तसेच यज्ञ मंडपाजवळ रंगीबेरंगी फुलांतून महादेव-पार्वती साकारण्यात आली होती. यासाठी विदेशातून फुलांची मागणी करण्यात आली होती. कोजागिरी पौर्णिमेला देवीचरणी अर्पण केलेल्या या फुलांच्या आरास व सजावटीचे भाविकांतून कौतुक होत आहेत.