लोकसत्ता प्रतिनिधी

आर्काइव्हमधील सर्व बातम्या मोफत वाचण्यासाठी कृपया रजिस्टर करा

सातारा : छत्रपती शिवाजी महाराज यांचे वारस असलेले खासदार उदयनराजे भोसले यांच्यासह त्यांच्या वारसांना जमीन महसूल करात यापूर्वी देण्यात आलेली सूट तहहयात सुरू ठेवण्याचा निर्णय राज्य शासनाने घेतला आहे.

छत्रपती शिवाजी महाराज यांच्या घराण्याचे राज्याच्या इतिहासातील अनन्यसाधारण महत्त्व विचारात घेऊन भोसले कुटुंबीयांची उपजीविका त्यांच्या दर्जानुसार होण्यासाठी घराण्याच्या खासगी जमिनी आणि इतर मालमत्तांना शासनाने १९५३ पासून महसुलात सूट दिलेली आहे. ही सवलत सध्याही सुरू असून, ती खासदार उदयनराजे भोसले यांच्या हयातीनंतर वंशपरंपरेने त्यांच्या रक्ताच्या वारसांना तहहयात सुरू ठेवण्यास मान्यता देण्यात आली आहे. याबाबत शासन निर्णय प्रसिद्ध करण्यात आला आहे.

आणखी वाचा-Devendra Fadnavis : कठोर राजकारणी कोण मोदी की अमित शाह? देवेंद्र फडणवीसांनी काय उत्तर दिलं?

महाराष्ट्र शासनाच्या महसूल व वन विभागाने काढलेल्या या शासन निर्णयात म्हटले आहे, की छत्रपती शिवाजी महाराज यांच्या घराण्याचे महत्त्व लक्षात घेऊन घराण्याच्या खासगी जमिनी आणि इतर मालमत्तासंदर्भात वेळोवेळी शासन आदेश काढून सूट दिलेली आहे.

१९५३ मध्ये याबाबत प्रथम निर्णय घेण्यात आला होता. राज्य शासनाच्या वतीने कॅप्टन श्रीमंत शाहू प्रतापसिंह भोसले यांना अशी सूट दिली होती. त्यांच्या निधनानंतर मुलगा श्रीमंत प्रतापसिंह महाराज शाहू महाराज भोसले यांना १९५७ च्या शासन निर्णयानुसार सूट देण्यात आली. त्यानंतर १९८० च्या शासन निर्णयानुसार ही सूट उदयनराजे भोसले यांना दिली होती. आता ९ जानेवारीच्या शासन निर्णयानुसार खासदार उदयनराजे भोसले यांच्या हयातीनंतर वंशपरंपरेने त्यांच्या वारसांना तहहयात सूट सुरू ठेवण्यास मान्यता देण्यात आली आहे.

मराठीतील सर्व महाराष्ट्र बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Land revenue exemption continues for heirs of chhatrapati shivaji maharaj including udayanraje bhosale mrj