सध्या नागपूरमध्ये महाराष्ट्र विधिमंडळाचं हिवाळी अधिवेशन सुरू आहे. शेतकऱ्यांच्या विविध प्रश्नांवरून विरोधी पक्षांनी सरकारला धारेवर धरलं आहे. राज्यात कायदा आणि सुव्यवस्थेवरूनही सरकारवर टीका केली जात आहे. दरम्यान, प्रहार जनशक्ती संघटनेचे अध्यक्ष बच्चू कडू यांनी विधानसभेत दमदार भाषण केलं. राज्यात शांतता ठेवायची असेल तर डॉ. बाबासाहेब आंबेडकर यांचे वंशज प्रकाश आंबेडकर यांनाच मुख्यमंत्री केलं पाहिजे, अशी मागणी बच्चू कडू यांनी केली.
आम्ही आठ वर्षे मराठा मुख्यमंत्र्याला दिली. पण त्यांनी मराठ्यांना काहीच दिलं नाही, असा आरोप बच्चू कडूंनी आपल्या भाषणात केला. शिवाय राज्यात दलित, माळी किंवा तेली समाजाचेही मुख्यमंत्री व्हायला हवेत, अशी मागणीही त्यांनी केली.
विधानसभेत केलेल्या भाषणात बच्चू कडू म्हणाले, “राज्यात शांतता ठेवायची असेल तर पूज्य डॉ. बाबासाहेब आंबेडकरांचे वंशज प्रकाश आंबेडकर यांनाच मुख्यमंत्री केलं पाहिजे. खऱ्या अर्थाने ज्यांनी आपल्या देशाला घटना दिली, त्यांच्या वंशजासाठी आपण किमान एवढं तरी केलं पाहिजे. अशा पद्धतीने पुढे जायला काय हरकत आहे.”
हेही वाचा- मनोज जरांगेंच्या मागणीवर गौतमी पाटीलची प्रतिक्रिया; म्हणाली, “मला यावर…”
“प्रकाश आंबेडकर मुख्यमंत्री झाले तर राज्यात शांतता राहील. हे मी मुद्दाम विधानसभेत बोलत आहे. पण असं करायला आपली काय हरकत आहे. दलित मुख्यमंत्री का होऊ नये? माळी किंवा तेली मुख्यमंत्री का होऊ नये? दलित, माळी किंवा तेली समाजाचाही मुख्यमंत्री झाला पाहिजे. आम्ही आठ वर्षे मराठा मुख्यमंत्र्याला दिले. पण त्यांनी मराठ्यांना काहीच दिलं नाही,” असंही बच्चू कडूंनी नमूद केलं.
