शिवसेना गृहमंत्रीपदासाठी आग्रही? दिलीप वळसे पाटील म्हणाले “मुख्यमंत्र्यांनाच…”

मुख्यमंत्री नाराज असल्याची चर्चा सुरु असतानाच दिलीप वळसे पाटील उद्धव ठाकरेंना भेटण्यासाठी पोहोचले होते. या भेटीनंतर उद्धव ठाकरे यांनी आपण नाराज नसल्याचं स्पष्ट केलं. दुसरीकडे दिलीप वळसे पाटील यांनीही पत्रकार परिषद घेत सर्व मुद्द्यांवर स्पष्टीकरण दिलं.

“शिवसेना-राष्ट्रवादीत मुख्यमंत्री आणि गृहमंत्रीपदाच्या अदलाबदलीची शक्यता”

दिलीप वळसे पाटील म्हणाले, “या प्रकरणावर मुख्यमंत्री उद्धव ठाकरे यांनी मुख्यमंत्री कार्यालयामार्फत आधीच खुलासा केला आहे. अशाप्रकारची कुठलीही नाराजी नाही. नाराजी असण्याचा प्रश्न नाही. आम्ही परस्परांना विश्वासात घेऊनच सगळे निर्णय घेत असतो”.

यावेळी त्यांना शिवसेना गृहमंत्रीपदासाठी आग्रही आहे का? असं विचारण्यात आलं असता ते म्हणाले की, “मला तरी तसं वाटत नाही. पण उद्या मुख्यमंत्री जर तुम्हाला भेटले तर त्यांनाच विचारा”.

चंद्रकांत पाटलांचा गौप्यस्फोट –

राष्ट्रवादी मुख्यमंत्रीपदासाठी उत्सुक आहे. तसंच शिवसेना आणि राष्ट्रवादीमध्ये मुख्यमंत्री आणि गृहमंत्रीपदाच्या अदलाबदलीची शक्यता असल्याचा दावा सुधीर मुनगंटीवार यांनी एबीपी माझाशी बोलताना केला आहे. ते म्हणाले की, “शिवसेनेकडून राष्ट्रवादीकडून गृहमंत्रीपद मागितलं जात आहे. हे ऐकूनच मला आश्चर्य वाटलं. मुख्यमंत्र्यांना सर्व मंत्र्यांचे अधिकार असतात. राज्याचे प्रमुख मुख्यमंत्री असून त्यांना कोणतंही खातं ठेवण्याची गरज नाही. सर्व खाती त्यांच्या नियंत्रणात असतात. राष्ट्रवादीकडूनही कधीतरी खासगी आम्हाला मुख्यमंत्रीपद हवी असल्याची चर्चा सुरु असते. आता कदाचित त्यांच्यात अदलाबादल होणार असेल तर माहिती नाही”.

पुढे ते म्हणाले की, “गृहमंत्रीपद भाजपावर सूड उगवण्यासाठी हवं आहे, जनतेची सेवा करण्यासाठी, कायदा-सुव्यवस्था राखण्यासाठी नको. याच सूड भावनेतून राज्याचा एक राजकीय पक्ष भाषा करत असेल तर आश्चर्य आहे” शिवसेना नेते चंद्रकांत खैरे यांनीदेखील गृहखातं शिवसेनेला मिळाला तर आनंदच असल्याचं म्हटलं आहे.

मुख्यमंत्र्यांकडून स्पष्टीकरण –

गृहमंत्र्यांवर मुख्यमंत्री नाराज अशा बातम्या काही माध्यमांवर येत आहेत. या बातम्यांचे मुख्यमंत्री उद्धव ठाकरे यांनी खंडन केले आहे, असं मुख्यमंत्री कार्यालयाने म्हटलं आहे. “अशा बातम्या चुकीच्या आणि विपर्यास्त करणाऱ्या असून, माझा माझ्या सहकाऱ्यांवर पूर्ण विश्वास आहे. ते उत्तम काम करीत आहेत,” असे मुख्यमंत्री उद्धव ठाकरे यांनी स्पष्ट केले आहे.