Maharashtra Assembly Budget 2024-2025: “मी काही यात नवखा नाहीये”, अजित पवारांचं विरोधकांना प्रत्युत्तर; अर्थसंकल्पावरील टीकेवर प्रतिक्रिया!

मी दहाव्यांदा आज अर्थसंकल्प सादर केला आहे. त्यामुळे आम्ही काही यात नवखे नाहीयेत. अनेक वर्षं राज्यकारभार पाहात असल्यामुळे काही निर्णय घेतल्यानंतर त्याच्या अंमलबजावणीसाठी तेवढी क्षमता आपल्या राज्यात आहे का? तेवढा निधी आहे का? केंद्रानं राज्यांना घालून दिलेल्या नियमात गोष्टी बसतायत का? याचा विचार करून मी हा अर्थसंकल्प सादर केला आहे - अजित पवार</p>

निवडणुका आल्यानंतर अशा काही घोषणा केल्या जातात. आजचा अर्थसंकल्प म्हणजे आश्वासनांची अतीवृष्टी, थापांचा महापूर आहे. सगळ्याच घटकांना आपल्यासोबत जोडण्याचा हा एक खोटा प्रयत्न आहे. देवेंद्र फडणवीसांच्या भाषेत हे खोटं नरेटिव्ह आहे. या योजनांसाठी आर्थिक तरतूद कशी करणार? याचा त्या कुठेही उल्लेख नाही. त्यांनी आजपर्यंत ज्या घोषणा केल्या, त्यातल्या किती पूर्ण झाल्या, यावर तज्ज्ञांची एक समिती नेमून विधानसभा निवडणुकांच्या आधी त्यावर श्वेतपत्रिका जाहीर करावी - उद्धव ठाकरे</p>

नोंदणी झालेल्या दस्तास कमी मुद्रांक शुल्क भरल्याचे निष्पन्न झाल्यास त्या फरकाच्या रकमेवर दस्त निष्पादित केल्याच्या तारखेपासून आकारण्यात येणाऱ्या दंडाची रक्कम दरमहा २ टक्के होती, ती आता १ टक्के करण्याचा निर्णय घेतला आहे. वर्षाला २४ टक्के होती, ती आता १२ टक्के करण्यात आली आहे. मुद्रांक शुल्क परताव्यासाठी ऑनलाईन पद्धतीने अर्ज करता येईल. त्यासाठीची कालमर्यादा मुद्रांक खरेदीपासून ६ वर्षांपासून १ वर्ष करण्यात येईल - अजित पवार</p>

२०२४-२५ मध्ये एकूण खर्चासाठी ६ लाख १२ हजार २९३ कोटींचा निधी प्रस्तावित आहे. महसूल जमा ४ लाख ९९ हजार ४६३ कोटी रुपये, महसूली खर्च ५ लाख १९ हजार ५१४ कोटी प्रस्तावित आहे. परिणामी २० हजार ५१ कोटी रुपये महसुली तूट अपेक्षित आहे - अजित पवार</p>

पावसाळ्यात कल्याण-नगर मार्गावरील माळशेज घाटाला भेट देणाऱ्या पर्यटकांची मोठी संख्या आहे. या घाटात सर्व सोयींनी युक्त अत्याधुनिक व्युईंग गॅलरी उभारण्यात येईल. नागपुरात रामटेक विकास आराखड्यासाठी पहिल्या टप्प्यात १५० कोटींच्या विकासकामांना परवानगी देण्यात आली आहे - अजित पवार</p>

शिवकालीन १२ किल्ल्यांना जागतिक वारसा नामांकन प्राप्त व्हावे म्हणून युनेस्कोकडे प्रस्ताव पाठवण्यात आला आहे. कोकणातील कातळशिल्पे, पंढरपूर वारी, दहीहंडी उत्सव व गणेशोत्सव याबाबतीतले प्रस्ताव पाठवण्यात येणार आहे. शासनाकडून रायगडावर शिवराज्याभिषेक सोहळा दरवर्षी साजरा केला जाणार आहे. त्यासाठी शासनाकडून निधी दिला जाईल - अजित पवार</p>

शिवडी-न्हावाशेवा प्रकल्पांतर्गत शिवडी-वरळी जोडरस्त्याचे ५७ टक्के काम झाले असून डिसेंबर २०२५ अखेपर्यंत काम पूर्ण होईल. बाळकुंभ येथील गायमुखजवळील ठाणे किनारी मार्गाची लांबी १३.४५ किमी असून ३३६४ कोटींचं हे काम मे २०२८ पर्यंत पूर्ण होणं अपेक्षित आहे. मुंबई किनारी मार्गाचं बहुतांश काम पूर्ण झालं असून दोन्ही मार्गिका अंशत: खुल्या करण्यात आल्या आहेत - अजित पवार</p>

मुंबई, पुणे व नागपूर शहरांमध्ये एकूण ४४९ किमी लांबीच्या मेट्रो मार्गिका उभारण्यास मान्यता देण्यात आली आहे. १२७ किलोमीटर लांबीच्या मार्गिका वाहतुकीसाठी खुल्या करण्यात आल्या आहेत. या आर्थिक वर्षात आणखी ३७ किलोमीट लांबीच्या मार्गिका खुल्या करण्यात येतील - अजित पवार</p>

महात्मा ज्योतिराव फुले आरोग्य योजना राज्यातल्या सर्व कुटुंबांना लागू कऱण्यात आली आहे. आरोग्य विमा संरक्षणाची रक्कम प्रतीकुटुंब १ लाखावरून ५ लाख करून घेण्यात आली आहे. आत्तापर्यंत १ हजार रुग्णालयांमध्ये उपचारांची सोय होती. त्यात आता ९०० रुग्णालयांची भर पडणार असून योजनेअंतर्गत १ हजार ३५६ प्रकारचे उपचार उपलब्ध झाले आहेत - अजित पवार</p>

राज्याने याचवर्षी तृतीयपंथीयांबाबतचं धोरण जाहीर केलं आहे. सर्व शासकीय योजनांमध्ये स्त्री-पुरुषांप्रमाणेच तृतीयपंथी हा पर्याय उपलब्ध करून देण्यात आला आहे. त्यामुळे तृतीयपंथी समाजाला योजनांचा लाभ घेणं सुलभ होईल - अजित पवार</p>

हयात लेके चलो

काएनात लेके चलो

चलो तो सारे जमाने को

साथ लेकर चलो...

दारिद्र्य निर्मूलन आणि जनतेचे राहणीमान उंचावण्यासाठी शासन कटिबद्ध आहे. विविध योजनांच्या माध्यमातून अविरतपणे सामाजिक विकासाचे प्रयत्न चालू आहेत -अजित पवार

नवी मुंबईतील महापे येथे २५ एकर जागेत इंडिया जेम्स अँड ज्वेलरी पार्क नियोजित आहे. त्यात ३ हजार सूक्ष्म, मध्यम व लघु उद्योग घटकांचा समावेश असून ५० हजार कोटींची गुंतवणूक होईल. त्यातून १ लाख रोजगार निर्माण होतील - अजित पवार</p>

वसतिगृहात प्रवेश न मिळालेल्या आर्थिक दृष्ट्या दुर्बल घटकातील विद्यार्थ्यांना डॉ. पंजाबराव देशमुख वसतीगृह निर्वाह भत्ता योजनेअंतर्गत भरीव वाढ करून दरवर्षी ३८ ते ६० हजार रुपयांपर्यंत निवास भत्ता देण्यात येत आहे. इतर मागासवर्गीय, भटक्या जमाती , विमुक्त जाती आणि विशेष मागास प्रवर्गातील उच्च शिक्षण घेणाऱ्या मुलांना ज्ञानज्योती सावित्रीबाई फुले आधार योजनेंतर्गत भरीव वाढ करून दरवर्षी ३८ हजार ते ६० हजार रुपयांपर्यंत निवासी भत्ता देण्यात येईल - अजित पवार</p>

राज्यातील विविध शैक्षणिक संस्थांमधून दरवर्षी ११ लाख विद्यार्थी उत्तीर्ण होतात. औद्योगिक व बिगर औद्योगिक आस्थापनांमध्ये प्रत्यक्ष कामाद्वारे प्रशिक्षण घेतल्यास गरजू युवकांना रोजगाराची संधी, तसेच उद्योगांना प्रशिक्षित मनुष्यबळ उपलब्ध व्हावे या उद्देशाने दरवर्षी १० लाख तरुण-तरुणींना प्रत्यक्ष कामावरील प्रशिक्षण देण्यासाठी मुख्यमंत्री युवा कार्य प्रशिक्षण योजना मी जाहीर करत आहे. त्यासाठी प्रती प्रशिक्षणार्थी दरमहा १० हजार रुपये विद्यावेतन दिलं जाईल. त्यासाठी दरवर्षी १० हजार कोटी रुपयांची तरतूद आहे - अजित पवार</p>