ही नाटकं कशाला, नाणार प्रकल्प रद्द करा: नितेश राणे

नाणार प्रकल्पाविरोधात गेल्या वर्षीपासून स्थानिकांनी सुरु केलेला संघर्ष तीव्र झाला असून आझाद मैदानात प्रकल्पग्रस्तांनी आंदोलन सुरु केले आहे. मुख्यमंत्र्यांनी प्रकल्पग्रस्तांना भेट न दिल्याने आंदोलन सुरुच राहील, अशी भूमिका प्रकल्पग्रस्तांनी घेतली आहे. हा मुद्दा बुधवारी विधानसभेत उपस्थित करण्यात आला. आमदार नितेश राणेंनी हा मुद्दा उपस्थित केला. प्रकल्पग्रस्तांचे आंदोलन दडपण्याचे प्रयत्न सुरु आहेत. पोलिसांनी महिला आंदोलकांना ताब्यात घेतले होते, असा आरोप त्यांनी केला. ही दडपशाही थांबवावी, अशी मागणी त्यांनी केली. ९५ टक्के लोकांनी हा प्रकल्प नको असे सांगितले आहे. उद्योगमंत्री सुभाष देसाई यांनी नाणार प्रकल्प रद्द करणार, असे वेळोवेळी सांगितले. नाणार प्रकल्प रद्द नाही झाला तर राजीनामा देऊ असेही ते म्हणाले होते. पण आम्हाला राजीनामा नको, हा प्रकल्प रद्द होणार का हे त्यांनी स्पष्ट करावं, अशी मागणी नितेश राणेंनी सभागृहात केली.

नितेश राणेंनी उपस्थित केलेल्या मुद्द्यावर उद्योगमंत्री सुभाष देसाई यांनी उत्तर दिले. नाणार प्रकल्पग्रस्तांच्या आंदोलनात पोलिसांनी गोळीबार केला होता. यात एकाचा मृत्यू झाला होता. अशी परिस्थिती पुन्हा निर्माण होऊ नये, यासाठी एप्रिलमध्ये आम्ही भूसंपादनाची अधिसूचना रद्द करण्याचे जाहीर केले होते. याबाबत योग्य तो निर्णय घेण्याचे आश्वासन मुख्यमंत्र्यांनी दोन्ही सभागृहात दिले असून सध्या नाणारसाठी भूसंपादनाची प्रक्रिया सुरु झालेली नाही, कोणालाही नोटीस देण्यात आलेली नाही, असे त्यांनी सांगितले. यावर आक्रमक झालेल्या नितेश राणेंनी ‘ही नाटकं बंद करा, एकदाचा तो प्रकल्प रद्द करुन टाका’, असे सत्ताधाऱ्यांना सुनावले.